शिरूर अनंतपाळ : तालुक्यातील वाढत्या अवैध धंद्यांना लगाम घालण्यात अपयश आल्याच्या आणि हप्तेखोरीच्या तक्रारी वाढल्यानंतर, लाचलुचपत प्रतिबंधक विभागाने (ACB) शिरूर अनंतपाळ येथे मोठी कारवाई केली आहे. या कारवाईनंतर पोलीस निरीक्षक विठ्ठल दराडे यांची तडकाफडकी बदली करण्यात आली असून, त्यांच्या जागी आर्थिक गुन्हे शाखेतील पोलीस निरीक्षक अनंत भंडे यांनी पदभार स्वीकारला आहे.
शिरूर अनंतपाळ तालुक्यात आर्थिक हितसंबंधांवरून बिट वाटप होत असल्याचा आरोप होता. यामुळे खोटे गुन्हे दाखल होण्याचे प्रमाण, अवैध धंदे आणि हप्तेखोरी वाढल्याच्या तक्रारी नागरिकांकडून सातत्याने केल्या जात होत्या. निरीक्षक दराडे यांचा कार्यकाळ संपलेला असतानाही त्यांना अतिरिक्त मुदतवाढ देण्यात आली होती, मात्र त्यांच्या कार्यपद्धतीविरोधात थेट पोलीस आयुक्तांकडे तक्रारी दाखल झाल्या होत्या.
अखेरीस, तालुक्यातील हिप्पळगाव येथील काही त्रस्त शेतकऱ्यांनी लाचलुचपत प्रतिबंधक विभागाकडे धाव घेतली. त्यांच्या तक्रारीवरून ACB ने पोलीस ठाण्यातील 'चामे' नामक पोलीस कर्मचाऱ्याला लाच घेताना रंगेहाथ पकडण्यासाठी सापळा रचला. या सापळ्यात तो कर्मचारी यशस्वीरित्या अडकला. ही कारवाई बिट जमादारांच्या माध्यमातून होत असल्याचे समोर आले असले तरी, या प्रकरणातील मुख्य सूत्रधार असलेल्या दोन बिट जमादारांची नावे कारवाईतून वगळण्यात आल्याची चर्चा तालुक्यात सुरू आहे.
या धडक कारवाईनंतर पोलीस निरीक्षक दराडे यांची तातडीने लातूर येथील पोलीस मुख्यालयात बदली करण्यात आली. त्यांच्या जागी अनंत भंडे यांनी पोलीस निरीक्षक म्हणून पदभार स्वीकारला आहे. भंडे हे यापूर्वी लातूरच्या आर्थिक गुन्हे शाखेत कार्यरत होते. त्यांच्या अनुभवामुळे तालुक्यातील अवैध धंदे आणि हप्तेखोरीची साखळी मोडून काढली जाईल, अशी अपेक्षा नागरिक व्यक्त करत आहेत. आता नवे पोलीस निरीक्षक कोणते धोरण अवलंबतात आणि अवैध धंद्यांना कितपत आळा बसतो, याकडे संपूर्ण तालुक्याचे लक्ष लागले आहे.