जालना ः राजूर ते जालना रोडवरील मानदेऊळगाव शिवारात भरधाव वेगाने येणाऱ्या आयशर वाहनाने मोटारसायकलला जोरदार धडक दिल्याने भीषण अपघात झाला. या अपघातात एका युवकाचा जागीच मृत्यू झाला असून दुसरा युवक गंभीर जखमी झाला आहे. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, आयशर वाहन चालकाने वेगावर नियंत्रण गमावल्याने मोटारसायकलला समोरून जोरदार धडक दिली. धडकेची तीव्रता इतकी होती की मोटारसायकलवरील मनोज ज्ञानेश्वर बेडके (वय 25, रा. चांदाई एक्को) यांचा जागीच मृत्यू झाला. तर विकास विष्णू ढाकणे (वय 28, रा. चांदाई एक्को) हे गंभीर जखमी झाले असून त्यांच्यावर उपचार सुरू आहेत.
अपघाताची माहिती मिळताच चंदनझिरा पोलिस ठाण्याचे पोलिस हवालदार जितेंद्र तागवले व मदन बहुरे यांनी घटनास्थळी धाव घेतली. त्यांनी तत्काळ मदतकार्य करत जखमीस उपचारासाठी हलवले तसेच मृतदेह पुढील तपासणीसाठी जालना येथील सामान्य रुग्णालयात पाठवण्यात आला. दरम्यान, अपघातामुळे काही काळ वाहतूक विस्कळीत झाली होती.