Jalna News: Marriage in crisis due to gas shortage
आन्वा, पुढारी वृत्तसेवा : गॅसच्या टंचाईने लग्नसराईच्या धामधुमीत खळबळ उडाली आहे. गॅसअभावी लग्न सोहळे लांबणीवर पडण्याची भीती असतानाच पंचांगातील मुहूर्ताची गणिते पाहून वधू-वरांच्या पित्यांचे धाबे दणाणले आहे. मार्च ते जुलै या काळात मोजकेच मुहर्त असून यंदा नोव्हेंबर-डिसेंबरमध्ये एकही मुख्य मुहूर्त नाही. त्यामुळे काहीही करा पण लग्न याच मुहूर्तावर उरका अशी आर्त साद मंगल कार्यालय चालकांना घातली जात आहे.
यंदाच्या लग्नसराईत मार्च ते जुलै या पाच महिन्यांत अवघ्या ३० मुख्य तिथी आहेत. तुलसी विवाहानंतर लग्नांची लगबग असते. मात्र यंदा नोव्हेंबर आणि डिसेंबर या दोन्ही महिन्यांत लग्नाचे मुहूर्त नाहीत. त्यात मुहूर्त असूनही गॅसअभावी लग्न पुढे ढकलणे मान्य नाही. त्यामुळे मंगल कार्यालय चालक केटरर्सकडे आगाऊ रक्कम दिली असली तरी आता गॅस नसेल तर डिझेल शेगडी वापरा किंवा चुली पेटवा कशी असा प्रश्न निर्माण होत आहेत.
पर्यायी व्यवस्थेवर भर गॅस टंचाई मोठी समस्या आहे. पण ग्राहकांचा दबाव वाढत असून वर्षभर मुहूर्त नसल्याने कोणालाही ठोस निर्णय घेता येत नाही. यामुळे आमच्या मंगल कार्यालयात बुकिंग झालेल्या लग्नांपैकी एकानेही लग्न पुढे ढकललेले नाही. त्यामुळे मंगल कार्यालय चालकांना तारेवरची कसरत आता करावी लागत असून डिझेल शेगड्या आणि लाकडांच्या चुलीची वापरण्याच्या तयारीत आहेत.- राजेंद्र जाधव, मंगल कार्यालय चालक