जालना ः शहरातील एमआयडीसी परिसरात सोरट नावाचा जुगार खेळवून स्वतःचा आर्थिक फायदा करून घेणाऱ्या एका व्यक्तीवर चंदनझिरा पोलिसांनी शुक्रवार, दि. 27 रोजी दुपारच्या पावणे दोन वाजेच्या सुमारास छापा टाकून कारवाई केली आहे. या कारवाईत पोलिसांनी जुगाराचे साहित्य आणि रोख रकमेसह आरोपीला रंगेहाथ पकडले.
मिळालेल्या माहितीनुसार, चंदनझिरा पोलिस ठाण्याचे सपोउपनी मनसुब वेताळ हे पथकासह गस्तीवर असताना त्यांना गुप्त बातमीदाराकडून माहिती मिळाली की, जालना एमआयडीसी भागातील पाण्याच्या टाकीजवळ एक व्यक्ती बेकायदेशीरपणे सोरट जुगार खेळवत आहे.
या माहितीच्या आधारे पोलिसांनी दुपारी 1.40 वाजेच्या सुमारास सापळा रचून छापा टाकला. यावेळी सतीश बाळू सकट (वय 29, रा. मातोश्री चौक, चंदनझिरा) हा लोकांकडून पैसे घेऊन जुगार खेळविताना आढळून आला.
पोलिसांनी त्याच्याकडून 830 रुपये रोख आणि सोरट जुगाराचे रंगीत साहित्य जप्त केले आहे. आरोपीविरुद्ध चंदनझिरा पोलिस ठाण्यात महाराष्ट्र जुगार प्रतिबंधक कायद्याच्या कलम 12 (अ) नुसार गुन्हा दाखल करण्यात आला आहे. पुढील तपास चंदनझिरा पोलिस ठाण्याचे पोलिस हवालदार प्रशांत देशमुख करत आहेत.