जालना ः येथील स्थानिक गुन्हे शाखेच्या पथकाने एका आरोपीला अटक करून त्याच्या ताब्यातून दोन चोरीच्या दुचाकी जप्त केल्या. या कारवाईत 2 लाख 25 हजार रुपयांचा मुद्देमाल हस्तगत करण्यात आला आहे.
पोलिसांनी दिलेल्या माहितीनुसार, बदनापूर पोलिस ठाण्यात दाखल असलेल्या दुचाकी चोरीच्या गुन्ह्याचा तपास सुरू असताना एलसीबीला खबऱ्याने माहिती दिली. त्यानुसार चंदनझिरा परिसरात सापळा रचून पोलिसांनी मुस्तफा अब्दुल सत्तार सय्यद (रा. चंदनझिरा, जालना) याला ताब्यात घेतले.
चौकशीदरम्यान आरोपीने दुचाकी चोरी केल्याची कबुली दिली. त्याच्याकडून बजाज पल्सर 150 व रॉयल एनफिल्ड क्लासिक 350 अशा दोन चोरीच्या दुचाकी जप्त करण्यात आल्या. जप्त वाहनांची अंदाजे किंमत अनुक्रमे 75 हजार व 1.50 लाख रुपये असून पोलिसांनी सव्वादोन लाख रुपयांचा मुद्देमाल जप्त केला आहे.
ही कारवाई पोलिस निरीक्षक पंकज जाधव यांच्या मार्गदर्शनाखाली स्थानिक गुन्हे शाखेच्या पथकाने केली.