जालना : मासिक पाळीत पोट दुखून मजुरी बुडू नये, यासाठी सुमारे ६९ ऊसतोड कामगार महिलांनी आपली गर्भपिशवीच काढून घेतल्याची धक्कादायक माहिती समोर आली आहे. हा प्रकार घनसावंगी आणि परतूर तालुक्यात ऊसतोड कामगारांच्या उपजिविका, आरोग्य आणि मुलांच्या शिक्षणासाठी काम करणाऱ्या संस्थेने उघडकीस आणला आहे.
दरम्यान, आपल्या पोटाची खळगी भरण्यासाठी ऊसतोड कामगारांना इतरत्र जावून ऊसतोडीचे काम करावे लागते. जोडप्याने अगोदर मुकादम यांच्याकडून उचल घेतलेली असते. ती उचल फेडून गाठीला काही पैसे जोडावेत या आशेने जोडपे कोयता घेऊन ऊसतोडीसाठी तयार होतात.
परंतु, ऊसाच्या फडाजवळ कोणतीही व्यवस्था नसते. मजुरी बुडू नये, घेतलेले कर्ज फेडण्यासाठी पतीला मदत व्हावी, यासाठी अनेक महिलांनी आपली गर्भपिशवी काढून टाकल्याचे धक्कादायक वास्तव समोर आले आहे.