Farmers cheated of crores of rupees
भोकरदन, पुढारी वृत्तसेवा तालुक्यातील केदारखेडा परिसरातील शेकडो शेतकऱ्यांची कोट्यावधी रुपयांची फसवणूक करणाऱ्या जवखेडा ठोंबरे येथील केवट कृषी सेवा केंद्राच्या मालकासह इतर दोघांना अटक करण्यात आली असून एका महिलेसह एक आरोपी फरार आहे. अटक करण्यात आलेल्या तीन आरोपींना भोकरदन न्यायालयासमोर उभे केले असता न्यायालयाने त्यांना पाच दिवस म्हणजे मंगळवार २२ जुलैपर्यंत पोलीस कोठडी सुनावली.
तालुक्यातील जवखेडा ठोंबरे येथील केवट कृषी सेवा केंद्राचे चालक मालक पवन भगवान बिलघे, करण भगवान बिलघे, प्रद्यमन भगवान बिलघे, त्यांचे वडील भगवान बिलघे व आई राजकोर भगवान बिलघे यांनी जून २०२४ ते मे २०२५ दरम्यान परिसरातील शेकडो शेतकऱ्यांची मका खरेदी करून त्यांना खरेदी केलेल्या मकाचे पैसे न देता करोडो रुपयांची फसवणूक केली असल्याचा आरोप असून यांच्या विरुद्ध तक्रार देणारे तालुक्यातील बरंजळा लोखंडे येथील श्रीमंत हिम्मतराव लोखंडे यांची १२१ क्विंटल मक्का खरेदी करून त्यांनाही पैसे न देता त्यांची फसवणूक केल्यामुळे हा गुन्हा दाखल झाला आहे.
त्यांनी दिलेल्या तक्रारीत म्हटले आहे की वरील आरोपींनी परिसरातील शंभर ते १२५ शेतकऱ्यांची एक कोटी २३ लाख २६ हजार ११७ रुपयांची फसवणूक केली आहे. त्यांच्या तक्रारीवरून भोकरदन पोलीस ठाण्यात गुन्हा नोंद झाल्यानंतर वरील आरोपींपैकी पवन भगवान बिलघे, प्रद्युमन भगवान बिलघे व भगवान बिलघे या आरोपींना भोकरदन पोलिसांनी अटक करून १८ जुलै रोजी भोकरदन न्यायालयासमोर हजर केले असता न्यायालयाने त्यांना पाच दिवस म्हणजे २२ जुलैपर्यंत पोलीस कोठडी सुनावली आहे.
या प्रकरणात शेकडो शेतकऱ्यांची कोट्यवधी रुपयांना फसवणूक झालेली असून या प्रकरणाचा अधिक तपास पोलीस उपनिरीक्षक सागर शिंदे हे करीत आहेत.