वाढत्या दराने दूध व्यवसाय संकटात

Dairy Business in Crisis Due to Rising Costs

आन्वा, पुढारी वृत्तसेवा : भोकरदन तालुक्यात ग्रामीण भागातील दूध उत्पादक शेतकऱ्यांची चांगलीच आर्थिक कोंडी झाल्याचे सध्या सर्वत्र चित्र आहे. पशुख-ाद्याचे दर झपाट्याने वाढले असूनही दुधाला मात्र अपेक्षित दर मिळत नसल्याने शेतकऱ्यांचे संपूर्ण अर्थकारणच कोलमडले आहे.

तालुक्यातील दुग्ध व्यवसाय हा शेतीला पूरक व दुय्यम व्यवसाय म्हणून मोठ्या प्रमाणावर केला जातो. या व्यवसायावर अनेक शेतकऱ्यांचे अर्थकारण अवलंबून असते. पशुगणनेनंतर हा आकडा नक्कीच वाढण्याची शक्यता आहे. तालुक्यात म्हैस वर्ग आणि जर्सी गाईंचे प्रमाण अधिक आहे, तर देशी गाईंची संख्या त्या तुलनेत फारच कमी आहे. देशी गाईंच्या संगोपनावर अधिक भर दिल्यास, दुधाचे उत्पादन व त्याची गुणवत्ता सुधारण्यास मदत होऊ शकते. दूध उत्पादक शेतकरी सध्या वाढत्या पशुखाद्याच्या किमतींमुळे आर्थिक अडचणीत आले आहेत.

वाढत्या उत्पादन खर्चाच्या तुलनेत दुधाला मिळणारा दर अत्यंत कमी आहे. सध्या म्हशीच्या दुधाचा दर फॅटनुसार किमान ६० (प्रति लिटर) तर गाईच्या दुधाचा दर किमान ५० (प्रति लिटर) आहे. पशुखाद्याच्या वाढत्या किमतींच्या तुलनेत हे दर अगदी अपुरे असून दुग्धव्यवसाय तोट्यात जाण्याची भीती आहे. शेतकऱ्यांनी सरकारकडे दूध दरवाढ करण्याची आणि अनुदानाच्या स्वरूपात मदत मिळण्याची मागणी केली जात आहे. जर दूध दरात सुधारणा झाली नाही, तर अनेक पशुपालक शेतकऱ्यांचा हा व्यवसाय अडचणीत येण्याची शक्यता आहे. भोकरदन तालुक्यातील दुग्ध व्यवसायावर मोठे संकट ओढवू शकते.