Babasaheb Sawde built a watering spot at his own expense
डोणगाव, पुढारी वृत्तसेवा : जाफराबाद तालुक्यातील नांदखेडा, किन्ही व कचनेरा या गट ग्रामपंचायतीच्या सरपंच सूर्यकलाबाई सवडे यांचे पुत्र बाबासाहेब सवडे यांनी माणुसकीचे अनोखे उदाहरण समाजासमोर ठेवले आहे दुष्काळाच्या झळा सोसणाऱ्या वन्यप्राण्यांना पिण्यासाठी पाणी उपलब्ध व्हावे, यासाठी त्यांनी स्वखर्चातून पाणवठा तयार केला असून, टँकरद्वारे त्यात नियमित पाणी टाकण्याचा उपक्रम सुरू केला आहे.
तालुक्यात यंदा दुष्काळी परिस्थिती गंभीर बनली आहे उन्हाच्या तीव्रतेसोबतच जलसाठ्यांनी तळ गाठल्याने नदी, नाले, तलाव आणि नैसर्गिक पाणवठे कोरडे पडू लागले आहेत परिणामी, जंगल परिसरातील वन्यप्राण्यांना पाण्याच्या शोधात भटकंती करावी लागत आहे.
पाण्याअभावी वन्यजीवांच्या अस्तित्वाचाच प्रश्न निर्माण होण्याची शक्यता असताना बाबासाहेब सवडे यांनी पुढाकार घेत वन्यजीवांसाठी पाण्याची व्यवस्था करण्याचा स्तुत्य उपक्रम हाती घेतला आहे.
स्वतःच्या खिशातून खर्च करून पाणवठा तयार करणे आणि त्यात टँकरने नियमित पाणी उपलब्ध करून देणे, ही बाब केवळ सामाजिक उपक्रम नसून निसर्गाप्रती असलेल्या संवेदनशीलतेचे दर्शन घडवणारी आहे.
दुष्काळामुळे केवळ माणसांनाच नव्हे, तर जंगलातील मुक्या प्राण्यांनाही पाण्यासाठी भटकंती करावी लागत आहे. मी स्वखर्चातून पाणवठा तयार केला आहे वन्यप्राण्यांना पिण्यासाठी पाणी मिळावे, यासाठी टँकरद्वारे नियमित पाणी टाकण्याची व्यवस्था केली आहे. प्रत्येकांनी आपल्या भागात प्राण्यांच्या पाण्याची व्यवस्था करावी.बाबासाहेब सवडे