शहापूर : अंबड तालुक्यातील पिठोरी सिरसगाव येथील शेतकऱ्याचा शॉर्टसर्किटमुळे अड़ीच एकर क्षेत्रावरील ऊस जळून खाक झाल्याची घटना गुरुवारी (दि.२२) रोजी दुपारी बारा वाजेच्या सुमारास घडली आहे. या घटनेत शेतकऱ्याचे जवळपास तीन लाख रुपयाचे नुकसान झाले आहे. शेतकऱ्यांनी वेळीच आग लागलेल्या उसाच्या शेतातीत बांधावरील ऊस तोडून बाजूला टाकल्यामुळे मोठा अनर्थ टळला आहे.
पिठोरी सिरसगाव येथील शेतकरी द्वारकादास विठ्ठलराव डुचे यांच्या गट क्रमांक ३ मधील एक एकर तर अनिल कल्याण माने यांचा दिड एकर ऊस शॉर्टसर्किटमुळे जळून खाक झाला आहे. गट क्रमांक ३ मध्ये महावितरणच्या तारा मध्ये घर्षण होऊन शॉर्टसर्किट झाले. त्यामुळे सदर उसाला आग लागल्याची माहिती आहे.
उसाला आग लागल्याचे शेतकऱ्यांच्या लक्षात येई पर्यंत आगीने रौद्ररूप धारण केले. सदर क्षेत्र गावा शेजारी असल्यामुळे गावातील ग्रामस्थांनी धाव घेत शर्थीचे प्रयत्न करीत आग आटोक्यात आणली आहे. पिठोरी सिरसगावसह परिसरात आधीच दुष्काळी परिस्थितीमुळे शेतकरी हतबल झाले आहे.