135,000 electricity consumers are at risk of having their power disconnected
जालना, पुढारी वृत्तसेवा : जालना जिल्ह्यात महावितरणने वीजबिल थकबाकीदारांविरुद्ध धडक मोहीम सुरू केली आहे. वारंवार आवाहन करूनही बिल भरण्यास प्रतिसाद न देणाऱ्या जवळपास १ लाख ३५ हजार ग्राहकांकडे १४९ कोटी ८३ लाख रुपयांची थकबाकी असल्यामुळे वीज बील न भरल्यास वीजपुरवठा चालू महिन्यात खंडित होण्याची शक्यता आहे.
छत्रपती संभाजीनगर परिमंडलात वीजविलांच्या प्रचंड थकबाकीमुळे महावितरणसमोर अडचणी निर्माण झाल्या आहेत. जालना मंडलातील १ लाख ३४ हजार ६१५ ग्राहकांकडे १४९ कोटी ८३ लाख रुपयांची रुपयांची थकबाकी आहे. वारंवार आवाहन करूनही अनेक ग्राहकांनी वीजबिल न भरल्याने महावितरणच्या थकबाकीचा आकडा दिवसेंदिवस वाढत आहे. महावितरणने आता थकबाकीदारांची वीजजोडणी खंडित करण्याची धडक मोहीम सुरू केली आहे.
ग्राहकांना वीजबिलाचा भरणा करण्यासाठी रांगेत उभे रहावे लागू नये, त्यांचा वेळ वाचावा, यासाठी महावितरणने ऑनलाइन वीजबिल भरण्याची सुविधा उपलब्ध करून दिली आहे. यूपीआय नेट बँकिंग, वॉलेट्स, मोबाईल अॅप्सवरील फोन पे, गुगल पे आणि महावितरणच्या वेबसाइटद्वारे घरबसल्या वीजबिल भरण्याची सुविधा उपलब्ध करून दिली आहे. विशेष म्हणजे ऑनलाईन व वेळेत पेमेंट करणाऱ्यांना महावितरणकडून भरघोस सूट दिली जाते.
कारवाईत अडथळे आणल्यास गुन्हे दाखल
थकबाकी वसुलीसाठी महावितरणच्या अधिकारी व कर्मचाऱ्यांची विशेष स्वतंत्र पथके तैनात करण्यात आली आहेत. काही संवेदनशील भागांत कर्मचाऱ्यांना विरोध होण्याची शक्यता लक्षात घेता, ही कारवाई पोलिस बंदोबस्तात केली जाणार आहे. कोणत्याही प्रकारची गुंडगिरी किंवा राजकीय दबावाला बळी न पडता ही मोहीम अधिक गतिमान केली जाणार असल्याचे सांगण्यात आले. मोहिमेत अडथळा आणणाऱ्यांवर पोलिसांत गुन्हे दाखल करण्याचा इशारा महावितरणने दिला आहे
महावितरणतर्फे सर्व वर्गवारीतील ग्राहकांनी तातडीने थकीत वीजबिल भरणे नियमाने गरजेचे आहे. अन्यथा महावितरणचे कर्मचारी त्यांचा वीजपुरवठा खंडित करू शकतात. त्यामुळे होणारी गैरसोय टाळण्यासाठी थकित वीजबिल भरून महावितरणला सहकार्य करावे.पवनकुमार कछोट, मुख्य अभियंता, महावितरण, छत्रपती संभाजीनगर