Vasmat Hyatnagar Stabbing One killed
हिंगोली : वसमत तालुक्यातील हयातनगर पाटीजवळ एका हॉटेलमध्ये बसलेल्या दोघांना खंजीरने भोसकल्याची घटना मंगळवारी रात्री उशीरा घडली. यामध्ये एकाचा मृत्यू झाला. तर एक जण गंभीर जखमी झाला आहे. वरिष्ठ पोलिस अधिकाऱ्यांसह हट्टा पोलिसांच्या पथकाने घटनास्थळी धाव घेऊन पाहणी केली. या प्रकरणातील पसार आरोपींचा शोध सुरु करण्यात आला आहे. मुलीच्या कारणावरून हा वाद झाल्याचे बोलले जात आहे.
वसमत तालुक्यातील थोरावा येथील विशाल मुंजाजी देवरे (वय २२) हा त्याचा मित्र ओमकार नरवाडे याच्यासोबत मंगळवारी रात्री साडेनऊ वाजण्याच्या सुमारास हयातनगर पाटीजवळील एका हॉटेलमध्ये बसले होते. यावेळी थोरावा येथील गोपाळ देवरे, ऋषीकेश कदम, शिवाजी देवरे हे तिघे आले. यामध्ये दोघांनी हॉटेलमध्ये प्रवेश करून तेथे बसलेल्या विशाल व ओमकार यांच्यावर खंजीरने वार करण्यास सुरवात केली.
दरम्यान, अचानक झालेल्या या हल्यामुळे दोघेही प्रतिकार करू शकले नाही. यामध्ये विशाल याच्या पोटावर व छातीवर खंजीरचा वर्मी वार बसला. तर ओमकार याच्याही पोटावर वार बसले. त्यानंतर मारहाण करणारे तिघेही पळून गेले. या घटनेची माहिती मिळताच पोलिस अधीक्षक श्रीकृष्ण कोकाटे, अप्पर पोलिस अधीक्षक अर्चना पाटील, गुन्हे शाखेचे निरीक्षक विकास पाटील, हट्टा पोलिस ठाण्याचे सहाय्यक पोलिस निरीक्षक संग्राम जाधव, जमादार कासले, सुर्यवंशी, सुरेशे यांच्यासह पथकाने घटनास्थळी धाव घेतली.
पोलिसांनी जखमी विशाल व ओमकार यांना उपचारासाठी वसमतच्या उपजिल्हा रुग्णालयात दाखल केले. मात्र, विशाल याचा मृत्यू झाल्याचे वैद्यकीय अधिकाऱ्यांनी जाहीर केले. तर गंभीर जखमी असलेल्या ओमकार याच्यावर प्राथमिक उपचार करून पुढील उपचारासाठी नांदेड येथे हलविल्याचे पोलिसांनी सांगितले. दरम्यान, या घटनेतील पसार झालेल्या आरोपींच्या शोधासाठी हट्टा पोलिस ठाण्याचे सहाय्यक पोलिस निरीक्षक संग्राम जाधव यांनी तीन पथके रवाना केली आहेत. त्या तिघांचाही कसून शोध घेतला जात आहे. सदर घटना मुलीच्या कारणावरून झाल्याची शक्यता पोलिसांनी व्यक्त केली असून आरोपींच्या अटकेनंतरच सर्व प्रकार उघड होणार असल्याचे पोलिसांनी सांगितले.