वसमत - चोंडी फाटा येथील साई उमेश पेट्रोल पंपावर झालेल्या खून प्रकरणात कुरुंदा पोलिसांनी पेट्रोल पंप मालक उमेश पांडववीर याच्यासह ५ जणांविरुद्ध खुनाचा गुन्हा दाखल केला आहे. गु.र.नं. ३७०/२०२६ अन्वये भा.न्या.सं. चे कलम १०३(१), १८९(२), १९१(२)(३), १९० सह आर्म्स अॅक्ट ४/२५ नुसार कारवाई करण्यात आली आहे.
इंडियन ऑईलचे सिनियर मॅनेजर गुलृलाकुंटला मणीप्रसाद (वय ३९, रा. नांदेड) यांनी दिलेल्या फिर्यादीवरून हा गुन्हा दाखल झाला. मयत महेश अण्णाराव शेळके (वय ३७, रा. लेगाव ता. अहमदपूर, ह. मु. नांदेड) हे एका ऑईल कंपनीत नोकरीला होते.
दि. ६ ऑक्टोबर रोजी दुपारी ४ वाजता चोंडी येथील पेट्रोल पंपावर "दुसऱ्याला पंप चालवायला कसा देतो" या वादावरून आरोपींनी बेकायदा जमाव जमवून शिवीगाळ व दगडफेक केली. त्यानंतर मुख्य आरोपी उमेश पांडववीर याने खंजिराने महेश शेळके यांच्या छातीत, पाठीत, डोक्यात, गळ्यावर सपासप वार करून निर्घृण हत्या केल्याचा आरोप आहे.
या गुन्ह्यात उमेश पांडववीर त्याची पत्नी, एक अनोळखी महिला आणि दोन तरुणांचा समावेश आहे. घटनेचा तपास पोउपनी गधकवाड करीत असून आरोपी फरार आहेत.