Tuljabhavani's Chaitra Festival to be held from March 30 to April 3.
तुळजापूर : साडेतीन शक्तिपीठांपैकी एकअसलेल्या आई तुळजाभवानीचा चैत्र पौर्णिमा उत्सव ३० मार्च ते ३ एप्रिल या कालावधीत साजरा होणार आहे. या काळात ३१ मार्च ते २ एप्रिलदरम्यान तुळजाभवानीचे मंदिर ३ दिवस दररोज २२ तास दर्शनासाठी खुले राहणार आहे. या तीन दिवसांत छबिन्याचे आकर्षण असणार आहे.
तुळजाभवानी मातेच्या चैत्र पौर्णिमा उत्सव कालावधीत राज्यभरासह कर्नाटक, आंध्र प्रदेश, तेलंगणा या राज्यातून १५ लाख भाविक दर्शनासाठी येणार असल्याचा अंदाज आहे. यंदा भाविकांची संख्या गतवर्षीच्या तुलनेत तीन लाखांनी वाढण्याची शक्यता आहे. त्या अनुषंगाने भाविकांसाठी पिण्याचे पाणी, सावलीची व्यवस्था करण्यात येत आहे.
देवस्थानच्या वतीने दिवसभराचे दर्शन झाल्यानंतर रात्रीच्या वेळी परिसराची स्वच्छता केली जाते. या शिवाय हळदी-कुंकू, खेळणी, पाळण्यांचे स्टॉल लावण्यात येत आहेत. पौर्णिमा उत्सवादरम्यान उन्हाचा पारा वाढण्याची शक्यता लक्षात घेता मंदिर परिसरात शेडनेट टाकून सावलीची व्यवस्था करण्यात येत आहे.