Dharashiv Thackeray Shiv Sena Appointments
कळंब: मागील वर्षभरापासून रिक्त असलेल्या तालुका प्रमुखांसह युवा सेना, शिवसेना व विधानसभा प्रमुखांच्या निवडी बुधवारी शिवसेना ठाकरे पक्षाने अधिकृतरीत्या जाहीर केल्या आहेत.
कळंब तालुका हा शिवसेनेचा बालेकिल्ला असून शिवसेनेत अगोरदच पडलेली फूट आणि विधानसभा निवडणुकीच्या तोंडावर तालुका प्रमुख शिवाजी कापसे यांनी शिंदे सेनेची धरलेली वाट त्यामुळे अनेक पदे ठाकरे गटा मध्ये रिक्त होती. स्थानिक स्वराज्य संस्थांच्या निवडणुका तोंडावर असताना कोणत्या पदाधिकाऱ्यांना संधी मिळणार याबाबत शिवसैनिकांमध्ये चर्चा होती. परंतु, खासदार ओमप्रकाशराजे निंबाळकर व आमदार कैलास घाडगे- पाटील यांनी निष्ठावंत शिलेदार निवडले.
या निवडीमध्ये कळंब तालुक्याचा प्रादेशिक समतोल साधत व जुन्या नव्यांचा मेळ घातलेला दिसून येत आहे. यामध्ये शिवसेनेचे तालुकाप्रमुख म्हणून डिकसळचे माजी उपसरपंच सचिन काळे, तर युवा सेनेचे तालुकाप्रमुख पाथर्डी येथील तरूण कार्यकर्ते पंडित देशमुख यांची निवड करण्यात आली आहे. तर जिल्हा समन्वयक म्हणून माजी तालुकाप्रमुख रामलिंग आवाड तर युवा सेनेचे जिल्हाप्रमुख म्हणून माजी युवा सेनेचे तालुकाप्रमुख मनोहर धोंगडे यांची निवड करण्यात आली आहे.
तर सेनेचे उपतालुका प्रमुख भारत सांगळे यांची जिल्हा सचिवपदी नियुक्ती करण्यात आली आहे. तर कळंब शहर निवडणूक प्रभारी म्हणून संजय मुंदडा यांना नियुक्ती दिली आहे. सौंदणा येथील युवक संदीप पालकर यांची युवा सेना उपजिल्हाप्रमुख म्हणून नियुक्ती करण्यात आली आहे. भगवान बांगर यांची जिल्हा सहसंघटक, गोविंद चौधरी विधानसभा समन्वयक, समाधान बाराते विधानसभा संघटक, शशिकांत पाटील तालुका संघटक, आकाश पवार तालुका समन्वयक, मेघराज मुंडे तालुका चिटणीस, नदिम मुलांनी तालुका सचिव, अमृत जाधव विधानसभा युवा अधिकारी तर शुभम करंजकर युवा अधिकारी कळंब पदी नियुक्ती देण्यात आली आहे.