Robbers Caught After Motorcycle Skids
वाशी, पुढारी वृत्तसेवा तालुक्यातील गोलेगाव शिवारातील सेरेंटिका कंपनीच्या पवनचक्की गोडाऊनवर दरोडा टाकण्याच्या उद्देशाने आलेल्या टोळीतील एक जण मोटारसायकल घसरल्याने पोलिसांच्या ताब्यात आला असून त्याचे चार साथीदार फरार झाले आहेत.
पोलिसांकडून मिळालेल्या माहितीनुसार, गोडाऊनवर सेक्युरिटी गार्ड म्हणून कार्यरत असलेले दत्तात्रय कागदे व त्यांचे सहकारी १० एप्रिल रोजी पहाटे तीनच्या सुमारास गस्त घालत असताना दोन विनानंबर मोटारसायकलींवरून पाच संशयित लोक तेथे आले. गार्डने बॅटरीचा प्रकाश टाकताच एकाने तलवारीसारखे हत्यार काढून त्यांच्याकडे धाव घेतली, तर इतरांनी दगडफेक करत गोडाऊनचे गेट तोडण्याचा प्रयत्न केला.
गार्डने तात्काळ पोलिसांना माहिती दिल्यानंतर गस्त घालणारे पोलीस पथक घटनास्थळी दाखल झाले. पोलिसांची चाहूल लागताच संशयितांनी पळ काढला. पाठलागादरम्यान इंदापूर वळणावर एका मोटारसायकलचा अपघात होऊन एक जण जखमी अवस्थेत सापडला, तर त्याचा साथीदार अंधाराचा फायदा घेत फरार झाला.
दुसऱ्या मोटारसायकलवरील तिघेही पसार झाले. ताब्यात घेतलेल्या आरोपीने आपले नाव राहुल रामचंद्र काळे (रा. रामेश्वरवाडी, ता. केज, जि. बीड; सध्या रा. पारगाव, ता. वाशी) असे सांगितले. त्याच्याकडील सॅकमधून लोखंडी कत्ती, दोरी, मोठे व लहान कटर तसेच इतर साहित्य जप्त करण्यात आले. फरार आरोपींची नावे राजू अर्जुन पवार, दादा शामराव काळे, चिवल्या उर्फ शिवाजी बप्पा काळे आणि बबन्या उर्फ बबन सोपान काळे अशी आहेत. या प्रकरणी सेक्युरिटी सुपरवायझर शिवहार राऊत यांच्या फिर्यादीवरून वाशी पोलीस ठाण्यात दरोड्याचा प्रयत्न व घातक शस्त्र बाळगल्याप्रकरणी गुन्हा दाखल करण्यात आला आहे.