वैजापूर तालुक्यातील राजकारणात गेल्या काही दिवसांपासून सुरू असलेल्या चर्चांना आज अखेर पुष्टी मिळाली आहे. जवळपास 30 ते 35 वर्षे शिवसेनेसाठी निष्ठेने काम केलेल्या वाणी कुटुंबाने आता भाजपात जाण्याचा निर्णय घेतला असून, या घडामोडीमुळे संपूर्ण तालुक्यात मोठी राजकीय खळबळ उडाली आहे. शिवसेना (उद्धव बाळासाहेब ठाकरे) गटासाठी हा मोठा धक्का असल्याचे राजकीय वर्तुळात बोलले जात आहे.
वाणी कुटुंबातील स्व. आर. एम. वाणी यांचे चिरंजीव बंडू वाणी यांनी ‘पुढारी’शी खास बोलताना पक्षप्रवेशाच्या निर्णयाला स्पष्ट शब्दांत पुष्टी दिली. “लवकरच आमचा अधिकृत पक्षप्रवेश सोहळा आयोजित केला जाणार आहे,” असे सांगत त्यांनी संपूर्ण घडामोडींवर मौन न ठेवता सरळ भूमिका स्पष्ट केली.
ते पुढे म्हणाले की, “ठाकरे कुटुंबाबद्दल किंवा शिवसेनेबद्दल कोणतीही नाराजी नाही. जवळपास तीन दशकांपेक्षा जास्त आम्ही शिवसेनेसोबत राहिलो. पण काही वैयक्तिक कारणांमुळे हा निर्णय घ्यावा लागत आहे.” त्यांच्या या वक्तव्यानंतर वैजापूरच्या राजकारणातील समीकरणे नव्याने आखली जातील, हे स्पष्टपणे दिसून येत आहे.
वैजापूर तालुक्यात वाणी कुटुंबाचा प्रभाव मोठा मानला जातो. स्थानिक पातळीवरील संघटन बांधणी, निवडणूक व्यवस्थापन आणि जनसंपर्क या तिन्ही क्षेत्रांत वाणी कुटुंबाने अनेक वर्षे शिवसेनेला भक्कम आधार दिला होता. त्यामुळे त्यांचा भाजपात प्रवेश म्हणजे एक मोठी राजकीय पुनर्रचना ठरणार आहे.
राजकीय जाणकारांचे मत आहे की,
“वाणी कुटुंबाच्या निर्णयामुळे भाजपाला स्थानिक पातळीवर बळ मिळणार असून, आगामी निवडणुकांमध्ये तालुक्यातील राजकीय गणित मोठ्या प्रमाणात बदलू शकते.”
शिवसेनेच्या (उद्धव ठाकरे गट) स्थानिक कार्यकर्त्यांमध्ये या निर्णयामुळे नाराजीची भावना दिसत असून, अनेकांना हा निर्णय धक्का बसल्यासारखा वाटत आहे. मात्र अधिकृत प्रतिक्रिया अद्याप मिळालेली नाही.
या निर्णयाची अधिकृत घोषणा होताच तालुक्यातील राजकीय हालचाली आणखी वेग घेण्याची शक्यता व्यक्त केली जाते. भाजपात प्रवेश केल्यानंतर वाणी कुटुंबाला कोणते पद किंवा जबाबदारी दिली जाईल, याबाबतही आता चर्चा रंगायला सुरुवात झाली आहे.
वैजापूर तालुक्यात आगामी विधानसभा आणि स्थानिक स्वराज्य निवडणुका डोळ्यासमोर ठेवून दोन्ही पक्षांसाठी ही हालचाल अत्यंत महत्त्वाची मानली जात आहे.
शिवसेनेसोबत अनेक वर्षे उभे राहिलेले वाणी कुटुंब आता भगव्यात दाखल होणार असल्याचे स्पष्ट होताच, अनेक कार्यकर्त्यांमध्ये उत्सुकता आणि तणाव दोन्ही वातावरण दिसत आहे. राजकीय समीकरणे बदलताना कोणत्या नव्या जोड्या तयार होतात आणि कोणत्यातरी गटात नाराजी वाढते, हे पाहणे पुढील काही दिवसांत अधिक रंजक ठरणार आहे.