Silver crosses three lakh rupees per kg again
छत्रपती संभाजीनगर, पुढारी वृत्तसेवा :
चांदीचे दर तब्बल ४ लाख १५ हजारांच्या विक्रमी उच्चाकांवर पोहोचल्यानंतर चार दिवसांतच दीड लाख रुपयांनी घसरले होते.
यानंतर मागील दोन दिवसांत चांदी पुन्हा ३७ हजारांनी वाढली आहे. सोनेही दोन दिवसांत सहा हजार २५० रुपयांनी वाढले. मंगळवारी सराफा बाजारात चांदी ३ लाख ४ हजार रुपये किलो, तर सोने १ लाख ६३ हजार २५० दराने विकल्या गेल्याचे जिल्हा सराफा असोसिएशनचे अध्यक्ष राजेंद्र मंडलिक यांनी सांगितले.
मागील महिन्याभरापासून जागतिक स्तरा-वरील घडामोडी आणि अनिश्चितता यामुळे सराफा बाजारात महिन्याभरापासूनच मोठी उलथापालथ सुरू आहे. याच कारणाने लग्नसराईच्या आधीपासूनच सराफा बाजारात तेजीही पाहायला मिळत आहे. पाच दिवसांपूर्वी गुरुवारी चांदीचा भाव तब्बल ४ लाख १५ हजारांच्या उच्चाकांवर पोहोचला होता. मात्र चारच दिवसांत चांदीच्या दरात मोठी घसरण होऊन प्रतिकिलो चांदीचे भाव २ लाख ६७ हजारांपर्यंत गडगडले होते.
यानंतर सोमवारी चांदीच्या दरात तब्बल २३ हजारांची, तर मंगळवारी १४ हजार रुपयांची वाढ होऊन प्रतिकिलो चांदीचे भाव ३ लाख ४ हजार रुपयांवर पोहोचले. दुसरीकडे प्रतितोळा एक लाख ८५ हजारांच्या सर्वोच्च शिखरावर पोहोचलेले सोनेही २८ हजारांनी स्वस्त होऊन १ लाख २५ हजार रुपयांपर्यंत खाली आले होते. मात्र मागील दोन दिवसांत सोनेही ६ हजार २५० रुपयांनी वधारल्याचे सराफा व्यापाऱ्यांनी सांगितले.