Sambhaji Nagar Car Accident three death
फुलंब्री, पुढारी वृत्तसेवा : फुलंब्री ते छत्रपती संभाजीनगर महामार्गावर मठपाटी परिसरातील पुलावरील दुभाजकाला कार धडकून तीन ठार तर दोन गंभीर जखमी झाल्याची घटना मंगळवारी (दि.२४) रात्री अकरा वाजेदरम्यान घडली.
सय्यद मारून माजीद (१८, रा. रोशनगेट), रियान जमील शेख (१६, रा. पिंपरी राजा), अफरात असिफ शेख (१७, रा. पिंपरी राजा छत्रपती संभाजीनगर) असे मृत झालेल्या तिघांची नावे आहेत. उजेर फिरोज खान, शरीफ शेख या दोघांवर छत्रपती संभाजीनगर येथील खासगी रुग्णालयात उपचार सुरू आहेत.
पोलिसांनी दिलेल्या माहितीनुसार छत्रपती संभाजीनगर येथील पाच जण कारने (एम. एच.२० ई.जे. १५८६) छत्रपती संभाजीनगर येथून फुलंब्री परिसरात जेवणासाठी एका हॉटेलवर आल्याची प्राथमिक माहिती आहे.
दहाच्या सुमारास रात्री जेवण करून कारने छत्रपती संभाजीनगरकडे रवाना झाले होते. मठपाटी पुलावर पादचाऱ्यांना पायी जाण्यासाठी तयार केलेल्या डाव्या बाजूच्या दुभाजकाला कारची जोरदार धडक बसली. हा अपघात इतका भीषण होता की कार पूर्णपणे चक्काचूर झाली होती.
या घटनेची माहिती मिळताच रुग्णवाहिका चालक विजय देवमाळी यांनी तात्काळ घटनास्थळी धाव घेऊन फुलंब्री पोलिसांच्या मदतीने जखमींना उपचारासाठी फुलंब्री ग्रामीण रुग्णालयात दाखल केले असता सय्यद मारून, रियान शेख, अफरात शेख या तिघांना डॉक्टरांनी तपासून मृत घोषित केले. तर उजेर खान, शरीफ शेख या दोन्ही गंभीर जखमींना प्राथमिक उपचार करून घाटी रुग्णालयात दाखल करण्यात आले.