In four days, the price of silver increased by a staggering 27,000
छत्रपती संभाजीनगर, पुढारी वृत्त सेवा: सोने दरात सातत्याने वाढ सुरूच असून, मागील चार दिवसांत सोने प्रतितोळा तब्बल ४ हजार ५०० रुपयांनी महागले आहे. तर चांदीची चकाकी तब्बल २७ हजारांनी महागली आहे. त्यामुळे शहरातील सराफा बाजारात एक तोळा सोने १ लाख ६४ हजार रुपये, तर चांदी प्रतिकिलो ३ लाख ६२ हजारांच्या विक्रमी उच्चांकावर पोहोचल्याचे जिल्हा सराफा असोसिएशनचे अध्यक्ष राजेंद्र मंडलिक यांनी सांगितले.
जागतिक स्तरावरील घडामोडी आणि सुरक्षित गुंतवणुकीसाठी मागणीत सातत्याने होणारी वाढ यामुळे सोने-चांदीच्या किमती दिवसेंदिवस वाढतच आहेत. गतवर्षी २४ कॅरेट सोने प्रति १० ग्रॅमचा भाव ६४ हजार १०० रुपये असा होता. या वर्षभरात सोने दरात तब्बल एक लाख रुपयांची वाढ झाली आहे. मागील चार दिवसांत प्रतितोळा साडेचार हजार रुपये वाढले आहेत.
त्यामुळे सोन्याचे दर १ लाख ५९ हजार ५०० रुपयांवरून १ लाख ६४ हजारांच्या विक्रमी उच्चांकावर पोहोचले आहे. सोन्यापाठोपाठ चांदीचे दरही सातत्याने वाढत असून, या चार दिवसांत चांदीचे भाव तब्बल २७ हजार रुपयांनी वाढल्याने मंगळवारी शहरातील सराफा बाजारात चांदीची चकाकी ३ लाख ६२ हजारांपर्यंत वधारल्याचे सराफा व्यापाऱ्यांनी सांगितले.