Illegal sand extraction from Godavari River; seized material worth ₹10 lakh
पैठण, पुढारी वृत्तसेवा पैठण तालुक्यातील हिरडपुरी येथे गोदावरी नदीतून रात्रीच्या वेळी मोठ्या प्रमाणावर वाळू उपसा व वाहतूक सुरू असल्याचे समोर आले आहे. पाचोड पोलिसांच्या पथकाने रविवारी (दि. ६) दोन ब्रास वाळूसह १० लाख १० हजार रुपयांचा मुद्देमाल जप्त केला.
पारुंडी शिवारातील गट क्रमांक ७३ लगतच्या रस्त्यावरून अवैधरीत्या वाळू तस्करी करणारे राहुल गंगाराम कुऱ्हाडे, सोहेल अन्वर शेख आणि गौरव विनोद डुकळे हे विनाक्रमांकाच्या मिनी हायवामधून वाळूची वाहतूक करत असताना पोलिसांना आढळून आले. पाचोड पोलिस ठाण्याचे सहायक पोलिस निरीक्षक सचिन पंडित यांच्या मार्गदर्शनाखाली पोलीस हेड कॉन्स्टेबल साबळे, सानप आणि आयनले यांनी वाहनाची तपासणी केली.
सदर वाळू वाहतूक करणारे वाहन गणेश भागाजी डुकळे यांच्या मालकीचे असून, संदीप छबुराव डुकळे यांच्या सांगण्यावरून हिरडपुरी येथील गोदावरी नदीतून अवैधरीत्या वाळूची वाहतूक केली जात असल्याची माहिती तपासात समोर आली. पाचोड पोलिसांनी पाच जणांविरुद्ध कारवाई करून दोन ब्रास वाळूसह मिनी हायवा असा एकूण १० लाख १० हजार रुपयांचा मुद्देमाल जप्त केला आहे.