Head-on collision between a truck and a pickup
सिल्लोड, पुढारी वृत्तसेवा : ट्रक-बोलेरो पिकअपची समोरासमोर धडक होऊन झालेल्या अपघातात दोन जण किरकोळ जखमी झाले. हा अपघात गुरुवारी (दि. २३) सकाळी सहा वाजेच्या सुमारास छत्रपती संभाजीनगर-जळगाव महामार्गावरील चिंचखेड्याजवळी पूर्णा नदीजवळ घडला.
चालक शेख सलीम (४०), मोहम्मद मुदस्सर (४४, दोघे रा. बुऱ्हाणपूर, मध्यप्रदेश) हे या अपघातात किरकोळ जखमी झाले. ट्रक (आरजे - ११, जीसी-४४८८) छत्रपती संभाजीनगरकडून जळगावकडे जात होता. तर या दरम्यान बोलेरो पिकअप (एमपी- ६८, जी- ०६२६) जळगावकडून छत्रपती संभाजीनगरकडे जात होती. पिकअप समोरील वाहनाला ओव्हरटेक करताना हा अपघात झाला. सुदैवाने यात जीवितहानी झाली नाही. मात्र पिकअप गाडीचे मोठे नुकसान झाले.
दरम्यान भवन-चिंचखेड्याजवळील पूर्णा नदीजवळ रस्त्याचे काम सुरु आहे. यामुळे या ठिकाणी वाहतूक एकाच मार्गाने सुरु असल्याने अपघात घडत आहे. शिवाय वाहतुकीचीही कोंडी होत आहे. तसेही या रस्त्याचे काम गेल्या आठ वर्षांपासून सुरू आहे. हे काम कासवगतीने होत असून, अधूनमधून अपघात घडत आहेत. आठवडाभरात काम सुरू असलेल्या ठिकाणी हा तिसरा अपघात आहे. काम तातडीने पूर्ण करण्याची मागणी नागरिकांमधून केली जात आहे.