छत्रपती संभाजीनगर, पुढारी वृत्तसेवा : दुष्काळग्रस्त शेतकऱ्यांप्रती बांधिलकी जपत राजस्थानचे राज्यपाल हरिभाऊ बागडे यांनी दुष्काळ निवारणाच्या उपाययोजनांसाठी मुख्यमंत्री सहायता निधीस आपले एक महिन्याचे वेतन देण्याचा निर्णय घेतला. मुख्यमंत्री देवेंद्र फडणवीस यांच्याकडे त्यांनी रविवारी (दि. १) मदतीचा धनादेश सुपूर्द केला.
मुख्यमंत्री देवेंद्र फडणवीस छत्रपती संभाजीनगर दौऱ्यावर आले असता त्यांनी राज्यपाल हरिभाऊ बागडे यांच्या निवासस्थानी भेट दिली. यावेळी बागडे यांनी दुष्काळग्रस्तांच्या मदतीसाठी एक महिन्याच्या वेतनाचा धनादेश मुख्यमंत्र्यांकडे दिला. मुख्यमंत्री फडणवीस यांनी या मदतीचा स्वीकार केला.
या वेळी इतर मागास बहुजन कल्याणमंत्री अतुल सावे, जिल्हा परिषद अध्यक्ष अविनाश गलांडे, आमदार सुहास शिरसाट, आमदार अनुराधा चव्हाण, महापौर समीर राजूरकर, माजी खासदार डॉ. भागवत कराड, विभागीय आयुक्त जी. श्रीकांत, जिल्हाधिकारी विनय गौडा जी. सी. यांच्यासह मान्यवर उपस्थित होते.