छत्रपती संभाजीनगर: जागतिक स्तरावरील अनिश्चिततेमुळे सातत्याने दर वाढून सोने-चांदीचे भाव विक्रमी उच्चाकांवर पोहोचले असताना आता याच कारणाने सोने-चांदीच्या दरात घसरणही सुरू आहे. तीन दिवसांत पिवर सोने प्रतितोळा १० हजार रुपयांनी स्वस्त झाले आहे. तर चांदीचे भावही प्रतिकिलो मागे २२ हजार रुपयांनी खाली उतरले आहेत.
मध्यपूर्वेत भडकलेल्या युद्धामुळे आणि याच कारणामुळे निर्माण झालेल्या गॅस टंचाईने सराफा बाजारावरही थेट परिणाम जाणवत असल्याचे सोने-चांदीचे व्यापारी म्हणाले. युद्धामुळे आखाती देशात सोने-चांदीचा बाजार बंद पडला आहे. तर आपल्याकडेही सराफा बाजाराला युद्धाचा फटका बसला आहे.
गॅस टंचाईमुळे लग्नसराईवर विघ्न आल्याने शहरातही सोने चांदीची मागणी घटली आहे. तीन दिवसांपूर्वी म्हणजेच १७ मार्च रोजी तब्बल १ लाख ६१ हजार ५०० रुपये प्रतितोळा भाव असलेले सोने शुक्रवारी (दि.२०) रोजी १ लाख ५१ हजार ७०० रुपयांपर्यंत खाली आहे.
सोने-चांदी स्वस्त- युध्दामुळे आखाती देशातील सराफा बाजार बंद आहे. आपल्याकडेही युद्धामुळे गॅस टंचाई निर्माण होऊन लग्नसराई पुढे ढकलल्या जात आहे. याचा परिणाम सराफा बाजारावर होत असून, तीन दिवसांत सोने १० तर, चांदी २२ हजारांनी स्वस्त झाली आहे.नंदकुमार जालनावाला, गव्हर्मेंट अप्रुव्हल व्हॅल्युअर