Criminal Faisal Teja's firing on girlfriend
छत्रपती संभाजीनगर, पुढारी वृत्तसेवा : कुख्यात गुन्हेगार फैजल तेजाने त्याच्या मैत्रिणीवर गोळीबार केल्याची खळबळजनक घटना सोमवारी रात्री अकरा ते साडेअकराच्या सुमारास किलेअर्क भागात घडली. यात तरुणीच्या हातावर गोळी लागल्याने ती गंभीर जखमी असून तिला घाटीत दाखल करण्यात आल्याची माहिती पोलिस निरीक्षक मंगेश जगताप यांनी दिली.
अधिक माहितीनुसार, तेजाने काही महिन्यापूर्वी टीव्ही सेंटर येथे एका रिक्षाचालकावर हत्याराने हल्ला चढविला होता. त्या गुन्ह्यात तो हर्मूल जेलमध्ये कैद होता. तो नशेच्या गोळ्या, सिरप, गांजाचा व्यवसाय करत असल्याने अनेकवेळा जेलची वारी करून आलेला आहे.
तो हर्सल जेलमध्ये स्थाबद्ध असताना तेथून नशेचा धंदा चालवीत असल्याचे देखील उघडकीस आले होते. काही दिवसांपूर्वी तो जेलमधून सुटला होता. दरम्यान, त्याने यापूर्वी देखील मैत्रिणीवर हल्ले केलेले आहेत. सोमवारी रात्री त्याने मैत्रिणीवर थेट गोळी झाडली.
यात तरुणी गंभीर जखमी झाली. घटनेची माहिती मिळताच बेगमपुरा ठाण्याचे पोलिस निरीक्षक मंगेश जगताप यांनी फौजफाटा घेऊन घटनास्थळी धाव घेतली. त्यानंतर लगेच गुन्हे शाखेचे अधिकारी देखील दाखल झाले होते. तेजाला पोलिसांनी ताब्यात घेतले असून पुढील तपास सुरू आहे.
रात्री उशिरा पर्यंत गोळीबारीचे कारण समोर आलेले नव्हते. दरम्यान, शहरात अलिकडील काळात रात्री घडणाऱ्या गंभीर गुन्ह्याबाबत पोलिसांनी तातडीने पावले उचलावीत अशी मागणी नागरिकांनी केली आहे. खून, हाणामाऱ्या, अंमली पदार्थाचे सेवन यामुळे शहरातील कायदा, सुव्यवस्थेलाही तडा बसत असल्याचे चित्र आहे.