छत्रपती संभाजीनगर : मुलासोबत दुचाकीने जाणाऱ्या महिलेच्या गळ्यातील तीन तोळ्यांची मोहन माळ स्पोर्ट बाईकवर आलेल्या दोघांनी हिसकावून धूम ठोकली. ही घटना ३० ऑक्टोबर रोजी सकाळी अकराच्या सुमारास सिडको उड्डाणपुलावरून हायकोर्ट सिग्नलकडे जाणाऱ्या रस्त्यावर घडली. दरम्यान दोन्ही चोरटे सीसीटीव्ही कॅमेऱ्यात कैद झाले आहेत.
फिर्यादी शोभा कपिल कुमार जगताप (६१, रा. आर के कन्स्ट्रक्शन, हिरापूर) या त्यांच्या मुलासोबत दुचाकीने सकाळी अकराच्या सुमारास सिडको उाण- पूल मार्गे हायकोर्ट सिग्नलकडे जात होत्या. त्यांचे पाठीमागून एक काळ्या रंगाच्या स्पोर्ट बाईकवर दोघेजण आले. त्यातील पाठीमागे बसलेल्या मुलाने शोभा यांच्या गळ्यातील १ लाख ५० हजार रुपये किमतीची सोन्याची तीन तोळ्यांची मोहनमाळ हिसकावली. धावत्या दुचाकीवर घडलेल्या घटनेमुळे शोभा या प्रचंड घाबरल्या. त्यांनी आरडाओरड केली मात्र, चोरटे स्पोर्ट बाईकवरून सुसाट निघून गेले.
याप्रकरणी पुंडलिकनगर पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे. पुढील तपास उपनिरीक्षक अनिल उसूलकर करत आहेत. पुंडलिकनगर पोलिसांनी परिसरातील सीसीटीव्ही फुटेजची पाहणी करून कॅमेऱ्यात कैद झालेल्या दोन्ही चोरांचा शोध सुरू केला आहे.