पिशोर : पोलीस ठाण्याच्या पथकाने गोपनीय माहितीच्या आधारे चिंचोली लिंबाजी येथे धडक कारवाई केली. अवैधरित्या साठवून ठेवलेला २लाख २४ हजार ८० किमतीचा देशी व विदेशी मद्यसाठा जप्त केला. या प्रकरणी एका व्यक्तीविरुद्ध महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला आहे.
पोलिसांना मिळालेल्या गोपनीय माहितीच्या आधारे विनोदकुमार रामगोपाल जैस्वाल (वय ४८, रा. चिंचोली ली., ता. कन्नड, जि. छत्रपती संभाजीनगर) यांच्या घरावर छापा टाकण्यात आला. तपासणीदरम्यान कोणताही वैध परवाना नसताना विक्रीच्या उद्देशाने मोठ्या प्रमाणात देशी व विदेशी मद्याचा साठा बेकायदेशीररीत्या ठेवलेला आढळून आला. कारवाईदरम्यान विविध प्रकारच्या मद्याच्या बाटल्यांसह एकूण ₹२,२४,०८० किमतीचा मुद्देमाल जप्त करण्यात आला.
याप्रकरणी पिशोर पोलीस ठाण्यात महाराष्ट्र दारूबंदी कायदा अंतर्गत गुन्हा दाखल करण्यात आला असून पुढील तपास पोना फेरोज बर्डे करीत आहेत. ही कारवाई सहाय्यक पोलीस अधीक्षक अपराजिता अग्निहोत्री (कन्नड उपविभाग) यांच्या मार्गदर्शनाखाली सहाय्यक पोलीस निरीक्षक कुणाल सुर्यवंशी यांच्या नेतृत्वात पोलीस उपनिरीक्षक विश्वजित फरताडे, स.फौ.गजानन कराळे, पोना फेरोज बर्डे, पोलीस कॉन्स्टेबल गणेश कव्वाल, पवन खंबाट, कौतिक सपकाळ, विजय भोटकर, मपोशी कल्याणी देवरे तसेच सहाय्यक पोलीस अधीक्षक कार्यालयातील पोहेकॉ अमोल गायकवाड, पोलीस कॉन्स्टेबल मयूर वाळुंजकर, घुगे, प्रमोद सोनवणे यांच्या संयुक्त पथकाने यशस्वीरीत्या पार पाडली.