परळी वैजनाथ : पशुसंवर्धन, दुग्धव्यवसाय विकास मंत्री पंकजा मुंडे यांच्या प्रयत्नांतून परळीला मंजूर झालेल्या पशुवैद्यकीय महाविद्यालयासाठी परळी व लोणी येथील ७२ एकर शासकीय गायरान जमीन मंजूर करण्यात आली आहे. याबाबतचा शासन निर्णय निर्गमित करण्यात आला आहे.
परळी वैजनाथ व बारामती येथे नवे पशुवैद्यकीय महाविद्यालय स्थापन करण्यासाठी मंजूरी देण्यात आलेली आहे. परळीतील पशुवैद्यकीय महाविद्यालय उभारणीचा मार्ग आता मोकळा झाला आहे. यासाठी परळी तालुक्यातील मौजे लोणी व परळी वैजनाथ येथील एकूण ७२ एकर शासकीय गायरान जमीन शासनाने मंजूर केली आहे. काढण्यात आलेल्या शासन निर्णयानुसार, मौजे लोणी (ता. परळी वैजीनाथ) येथील गट क्र. ०७ मधील ८ हेक्टर ८० आर (२२ एकर) व मौजे परळी येथील स.नं. ४७८ मधील २० हेक्टर (५० एकर) अशी एकूण ७२ एकर जमीन नवीन पशुवैद्यकीय महाविद्यालय आणि पशुधन प्रक्षेत्र उभारणीसाठी प्रदान करण्यात येणार आहे.
या संदर्भातील शासन मान्यता महसूल व वन विभागाने मंजूर केली आहे.ही जमीन आता पशुसंवर्धन विभागाला हस्तांतरित करण्यात येणार आहे.या निर्णयामुळे परळी वैजनाथ, बीड जिल्ह्यासह संपूर्ण मराठवाडा भागातील पशुवैद्यकीय शिक्षण व संशोधनाला नवे बळ मिळेल आणि शेतकरी व पशुपालकांना आधुनिक सेवा देण्यासाठी प्रशिक्षित मनुष्यबळ निर्माण होण्यास मदत होणार आहे.या निर्णयासाठी राज्याचे मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांचे ना. पंकजा मुंडे यांनी आभार व्यक्त केले आहेत.