MIM Corporator Joins NCP
परळी वैजनाथ : परळीमध्ये नगरपरिषद निवडणुकीनंतर नवीन समीकरण पाहायला मिळत आहे. या राजकीय समीकरणांची जोरदार चर्चा राज्यपातळीवरील राजकारणात सुरु आहे. भाजप आणि एमआयएम हे अकोट नगरपरिषदेत एकत्र आल्याची प्रचंड चर्चा होत असताना परळीत अजित पवारांची राष्ट्रवादी काँग्रेस, एकनाथ शिंदेंची शिवसेना यांनी एमआयएमचा एकमेव निवडून आलेल्या सदस्यालाला गटनेता निवडीत एकत्र घेतले आहे.
यावरुन आता राजकीय धुरळा उठला आहे. परळीत या 'युती' वरुन राजकीय रान पेटले आहे. एका बाजूला एमआयएमचा नगरसेवक सत्ताधारी राष्ट्रवादीच्या गटात जिल्हाधिकाऱ्यां समोर गटनेता निवडताना अधिकृत सामील आहे. मात्र, आमची 'युती' नसल्याची भूमिका त्यांनी मांडली आहे. परळी वैजनाथ नगरपरिषद निवडणुकीत राष्ट्रवादी काँग्रेस पार्टी आणि मित्र पक्षाच्या गटात परळीतून एकमेव निवडून आलेल्या एमआयएमच्या (AMIM) सदस्याचा समावेश करण्यात आला आहे. परळी नगरपरिषदेतील विविध पक्ष व गटांच्या गटनेत्याची निवड प्रक्रिया जिल्हाधिकारी बीड यांच्या उपस्थितीत करण्यात आली. यामध्ये राष्ट्रवादी काँग्रेस पार्टी आणि मित्र पक्षाच्या गटनेतेपदी नगरसेवक तथा राष्ट्रवादीचे तालुकाध्यक्ष वैजनाथ सोळंके यांची निवड करण्यात आली.
या गटात नगराध्यक्ष व राष्ट्रवादी काँग्रेस अजित पवार गट -16 , शिवसेना शिंदे गट - 2, एमआयएम - 1, अपक्ष - 4 अशा 24 सदस्यांचा समावेश असलेला गट स्थापित करण्यात आला आहे. या गटामध्ये एमआयएमच्या एकमेव निवडून आलेल्या न.प.सदस्या शेख आयशा मोहसीन यांचाही समावेश आहे. त्यामुळे नगरपालिका सभागृहात आता अजित पवार यांच्या राष्ट्रवादी काँग्रेससोबत एकनाथ शिंदेंची शिवसेना आणि एमआयएम एकत्रित एका गटात दिसणार आहेत. परळीत नगराध्यक्ष राष्ट्रवादी काँग्रेसचा आहे. तर 35 नगरसेवकांपैकी राष्ट्रवादी काँग्रेस - 16 ,शिवसेना शिंदे गट - 2, भाजपा - 7,राष्ट्रवादी काँग्रेस शरद पवार गट - 2, काँग्रेस - 1, एम आय एम -1, अपक्ष -6 असे संख्याबळ आहे.
भाजपने आपला स्वतंत्र गट स्थापित केला असुन भाजपच्या गटात अपक्ष सहापैकी दोन न.प.सदस्य सामिल झाले आहेत.त्यामुळे परळी नगर परिषदेत भाजपचा गट 9 जणांचा झाला आहे. सभागृह गटनेता निवडीत स्थापित गटांचा विचार करता राष्ट्रवादीचा 24 जणांचा सर्वात मोठा गट तयार झाला असुन महायुतीतील दुसरा प्रमुख पक्ष असलेला भाजपचा गट 9 जणांचा झाला आहे. त्यामुळे परळी नगर परिषदेत महायुती आणखी भक्कम झाली असुन 36 पैकी 33 असे सभागृहात महायुतीचे संख्याबळ दिसणार आहे. शरद पवार राष्ट्रवादीचे 2 आणि काँग्रेस 1 असे उर्वरित संख्याबळ असणार आहे.
दरम्यान गटनेता निवडीमध्ये प्रशासकीय तांत्रिक प्रक्रिया पार पाडताना अधिकृतपणे राष्ट्रवादी काँग्रेसच्या गटात शिंदेंच्या शिवसेनेसह एमआयएमच्या नगरसेवकाने सहभाग घेतला आहे. मात्र या गटात आम्ही सामील झालो असलो तरी आमची युती झालेली नसल्याची अनोखी भूमिका एमआयएम च्या नगरसेवक पतीने घेतली आहे. याबाबत भूमिका मांडताना एमआयएमचे मोहसीन शेख यांनी सांगितले की, प्रभागाच्या विकासासाठी स्थानिक पातळीवर आम्ही सभागृहात सत्ता पक्षासोबत जाण्याचा निर्णय घेतला आहे. मात्र ही भूमिका म्हणजे आमची कोणत्याही पक्षाशी युती झालेली नाही. स्थानिक पातळीवर व न.प. सभागृहातील स्तरावर आम्ही या गटासोबत असणार आहोत, असेही मोहसीन शेख यांनी सांगितले.
गटनेता निवडीमध्ये प्रशासकीय तांत्रिक प्रक्रिया पार पाडताना अधिकृतपणे राष्ट्रवादी काँग्रेसच्या गटात शिंदेंच्या शिवसेनेसह एमआयएमच्या नगरसेवकाने सहभाग घेतलेला आहे. एमआयएमने स्थानिक पातळीवर आमच्या सोबत येण्याचा निर्णय घेतलेला आहे.त्यांचा एक न.प.सदस्य आता सभागृहात आमच्या सोबत असणार आहे. आपापल्या पक्षाच्या सभागृहाबाहेर राजकीय भूमिका स्वतंत्रच राहणार आहेत.- वैजनाथ सोळंके, नवनिर्वाचित न.प. गटनेता राष्ट्रवादी काँग्रेस