गौतम बचुटे
केज : विजेचे खांब उभे करीत असताना बाजूला थांबलेल्या एकाच्या अंगावर खांब पडल्याने मृत्यू झाला असल्याची दुःखद घटना घडली आहे. दिनांक २ ऑक्टोबर रोजी केज तालुक्यातील नाव्होली येथे रस्त्याच्या कडेला गुत्तेदारा मार्फत विजेचे खांब उभे करीत असताना पोल उभे करण्याच्या मशीनची लोखंडी साखळी तुटून त्याला लटकलेला विजेचा खांब बाजूला उभे असलेले बाबासाहेब दादाराव बिक्कड वय (६० वर्ष) यांच्या अंगावर पडला.
त्या अपघातात बाबासाहेब बिक्कड हे जखमी झाले. त्या नंतर त्यांना उपचारासाठी दवाखान्यात दाखल करण्यात आले होते. दरम्यान दि. ३ ऑक्टोबर रोजी उपचारा दरम्यान बाबासाहेब बिक्कड यांचा मृत्यू झाला. या प्रकरणी अद्याप गुन्हा दाखल झालेला नाही. बाबासाहेब बिक्कड यांच्या मृत्यूमुळे हळहळ व्यक्त होत आहे.