Kej Cow Rescue | केजमध्ये कत्तलीसाठी डांबून ठेवलेल्या आठ गोवंशीय प्राण्यांची सुटका; दोघांविरुद्ध गुन्हा

केज शहरात गोवंशीय प्राण्यांच्या अवैध कत्तलीसाठी डांबून ठेवलेल्या आठ जनावरांची पोलिसांनी धडक कारवाई करत सुटका केली आहे. या प्रकरणी पोलिसांनी दोन जणांविरुद्ध गुन्हा दाखल केला असून, या कारवाईमुळे परिसरात मोठी खळबळ उडाली आहे. सहाय्यक पोलीस अधीक्षक वेंकटराम यांच्या मार्गदर्शनाखाली ही कारवाई करण्यात आली.

मिळालेल्या माहितीनुसार, २७ मे रोजी सकाळी सुमारे ११ वाजण्याच्या सुमारास सहाय्यक पोलीस अधीक्षक वेंकटराम (IPS) यांना गोपनीय माहिती मिळाली होती. केज शहरातील एका शेतामध्ये गोवंशीय जातीचे काही प्राणी कत्तलीच्या उद्देशाने डांबून ठेवण्यात आल्याची माहिती पोलिसांना मिळाली. या माहितीची गंभीर दखल घेत सहाय्यक पोलीस अधीक्षक वेंकटराम यांनी तातडीने विशेष पथकाला कारवाईचे आदेश दिले.

आदेश मिळताच पोलिस उपनिरीक्षक अमीरोद्दीन इनामदार, पोलिस हवालदार बालासाहेब डापकर, धोंडीराम मोरे, राजू वंजारे, विशाल क्षीरसागर आणि विकास चोपणे यांच्या पथकाने संबंधित ठिकाणी धडक छापा टाकला. पोलिसांनी शेत परिसराची तपासणी केली असता तेथे बैल, गाय आणि गोऱ्हे अशा गोवंशीय जातीचे एकूण आठ प्राणी बांधून ठेवलेले आढळून आले. तपासादरम्यान हे प्राणी कत्तलीच्या उद्देशाने ठेवण्यात आल्याचा संशय पोलिसांना आला.

जप्त करण्यात आलेल्या या प्राण्यांची एकूण किंमत सुमारे १ लाख ६३ हजार रुपये असल्याचे पोलिसांनी सांगितले. पोलिसांनी तातडीने या सर्व जनावरांची सुटका करून त्यांना सुरक्षित ठिकाणी हलवले.

या प्रकरणी भागवत बारीकराव पारवे (रा. केज) आणि नौशाद उस्मान कुरेशी (रा. कुरेशी मोहल्ला, केज) यांच्या विरोधात केज पोलीस ठाण्यात गुन्हा दाखल करण्यात आला आहे. पोलिस हवालदार राजू वंजारे यांच्या फिर्यादीवरून संबंधित आरोपींवर कायदेशीर कारवाई सुरू करण्यात आली आहे.

दरम्यान, जिल्ह्यात अवैध कत्तल आणि गोवंशीय प्राण्यांची बेकायदेशीर वाहतूक रोखण्यासाठी पोलिस प्रशासनाकडून सातत्याने कारवाया सुरू आहेत. या कारवाईमुळे अशा प्रकारचे अवैध धंदे करणाऱ्यांमध्ये मोठी भीती निर्माण झाली आहे.

ही कारवाई जिल्हा पोलीस अधीक्षक नवनीत काँवत, अप्पर पोलीस अधीक्षक चेतना तिडके आणि सहाय्यक पोलीस अधीक्षक वेंकटराम यांच्या मार्गदर्शनाखाली करण्यात आली. पोलिसांच्या विशेष पथकाने नियोजनबद्ध पद्धतीने ही मोहीम यशस्वी केली.