राजेश सातपुते
साळवण : साखरी (ता. गगनबावडा) येथील करवंद काढण्यासाठी जंगलात गेलेल्या दाम्पत्यावर गवा रेड्याने अचानक हल्ला केल्याची घटना घडली. या हल्ल्यात सोनाबाई दत्तात्रय कांबळे या गंभीर जखमी झाल्या असून त्यांचे पती दत्तात्रय शंकर कांबळे यांना किरकोळ दुखापत झाली आहे.
मिळालेल्या प्राथमिक माहितीनुसार, सोनाबाई कांबळे व दत्तात्रय कांबळे यांच्यासह काही महिला करवंद काढण्यासाठी जंगल परिसरात गेले होते. घरी परत येत असताना इतर सोबती पुढे निघून गेले. मात्र, पाठीमागे राहिलेल्या या दाम्पत्यावर गवा रेड्याने पाठीमागून अचानक धडक दिली. या जोरदार धडकेत सोनाबाई कांबळे गंभीर जखमी झाल्या. त्यांच्या हाताला जबर मार लागून कोपरापासून हात मोडल्याचे सांगण्यात आले. तसेच डोक्याला गंभीर दुखापत झाली आहे. दत्तात्रय कांबळे यांनाही किरकोळ मार लागला आहे.
घटनेनंतर विलास पाटील, अमर कांबळे पं. स. सदस्य, १०८ चे चालक सतीश कांबळे, आरोग्य विभाग व वन विभागच्या मदतीने तत्काळ मदत कार्य करत दोघांनाही उपचारासाठी कोल्हापूर येथील खासगी रुग्णालयात हलवले. या घटनेमुळे साखरी परिसरात भीतीचे वातावरण निर्माण झाले असून जंगल परिसरात वाढत्या वन्यप्राण्यांच्या वावराबाबत नागरिकांमध्ये चिंता व्यक्त होत आहे.