Murgud Illegal Sound System Case
मुरगूड : गणेशमूर्ती आगमन मिरवणुकीदरम्यान साऊंड सिस्टीममध्ये प्रेशर मिडचा वापर केल्याप्रकरणी नानीबाई चिखली (ता. कागल) येथील नृसिंह तरुण मंडळाच्या अध्यक्ष, उपाध्यक्षांसह ट्रॅक्टर मालक आणि साऊंड सिस्टीम मालक अशा चौघांविरुद्ध मुरगूड पोलिसांनी गुन्हा दाखल केला. पोलिसांनी कारवाई करत सुमारे २० लाख रुपये किमतीचे साऊंड सिस्टीम, ट्रॅक्टर व ट्रॉलीसह साहित्य जप्त केले.
नानीबाई चिखली येथे सोमवारी सायंकाळी नृसिंह तरुण मंडळाच्या वतीने गणेशमूर्ती आगमन मिरवणूक काढण्यात आली होती. या मिरवणुकीत डॉल्बी साऊंड सिस्टीममध्ये प्रेशर मिडचा वापर करण्यात आल्याचे पोलिसांच्या निदर्शनास आले. जिल्हाधिकाऱ्यांच्या आदेशाचे उल्लंघन करून मानवी आरोग्य व सुरक्षिततेला धोका निर्माण होईल, अशा पद्धतीने साऊंड सिस्टीमचा वापर केल्याप्रकरणी ही कारवाई करण्यात आली.
याप्रकरणी गंगाराम भाऊसो खोंद्रे, विजय आण्णासो गोनुगडे, नंदकुमार दत्तात्रय घाटगे आणि रोहित महादेव पोवार (सर्व रा. चिखली) यांच्याविरुद्ध गुन्हा दाखल करण्यात आला आहे.
पोलिसांनी कारवाईदरम्यान महिंद्रा अर्जुन कंपनीचा ट्रॅक्टर, डंपिंग ट्रॉली तसेच व्ही.एम. कंपनीचे दोन बेस व दोन टॉप, प्रेशर मिड असलेले साऊंड सिस्टीमचे बॉक्स आणि चार अॅम्प्लिफायर असा सुमारे २० लाख रुपये किमतीचा मुद्देमाल जप्त केला.
गणेशोत्सवाच्या पार्श्वभूमीवर पोलिसांनी केलेल्या या कारवाईमुळे डीजे व साऊंड सिस्टीमचा वापर करणाऱ्या गणेश मंडळांमध्ये धास्ती निर्माण झाली आहे. ध्वनिप्रदूषणाबाबतच्या नियमांचे उल्लंघन करणाऱ्यांवर पोलिसांकडून कठोर कारवाई केली जाणार असल्याचे या कारवाईतून स्पष्ट झाले आहे.