नृसिंहवाडीत अधिक मासानिमित्त सामुदायिक विष्णू सहस्त्रनाम पठण
सुमारे एक हजार महिलांचा उत्स्फूर्त सहभाग
दत्त मंदिर परिसर भक्तिमय वातावरणाने दुमदुमला
प्रथमच आयोजित करण्यात आला विशेष उपासनेचा कार्यक्रम
श्रीधर स्वामी भजनी महिला मंडळ आणि सप्तर्षी प्रबोधन वर्गाचा पुढाकार
नृसिंहवाडी येथील प्रसिद्ध श्री दत्त मंदिर येथे ज्येष्ठ अधिक मासानिमित्त आयोजित करण्यात आलेले सामुदायिक विष्णू सहस्त्रनाम स्तोत्र पठण भक्तिमय वातावरणात संपन्न झाले. या विशेष धार्मिक उपक्रमात सुमारे एक हजाराहून अधिक महिला भाविकांनी उत्स्फूर्त सहभाग घेतल्याने संपूर्ण मंदिर परिसर भक्तिरसाने दुमदुमून गेला होता.
दर तीन वर्षांनी येणारा अधिक मास हा हिंदू धर्मामध्ये जप, तप, दानधर्म आणि विशेष उपासनेसाठी अत्यंत पवित्र व शुभ मानला जातो. या पवित्र महिन्याचे आध्यात्मिक महत्त्व लक्षात घेऊन भाविकांमध्ये भक्तीभाव वृद्धिंगत व्हावा आणि सामूहिक उपासनेतून सकारात्मक ऊर्जा निर्माण व्हावी, या उद्देशाने नृसिंहवाडी येथे प्रथमच अशा प्रकारच्या सामुदायिक विष्णू सहस्त्रनाम स्तोत्र पठणाचे आयोजन करण्यात आले होते.
दुपारी चार ते सहा या वेळेत झालेल्या या कार्यक्रमादरम्यान मंदिर परिसरात अत्यंत प्रसन्न आणि आध्यात्मिक वातावरण निर्माण झाले होते. कोल्हापूर, इचलकरंजी तसेच परिसरातील विविध भागांतून आलेल्या महिला भाविकांनी मोठ्या श्रद्धेने एकत्रित विष्णू सहस्त्रनाम पठण केले.
सामूहिक स्तोत्र पठणामुळे दत्तभक्तीचा एक वेगळाच अनुभव उपस्थितांना मिळाला. या कार्यक्रमाचे आयोजन श्री श्रीधर स्वामी भजनी महिला मंडळ आणि सप्तर्षी प्रबोधन वर्ग यांच्या वतीने करण्यात आले होते.
कार्यक्रम यशस्वी करण्यासाठी अर्चना मुनीश्वर आणि मेघा बांभोरीकर यांनी विशेष परिश्रम घेतले.दरम्यान, या भक्तिमय उपक्रमामुळे नृसिंहवाडी परिसरात दिवसभर धार्मिक उत्साहाचे वातावरण पाहायला मिळाले.