Kolhapur News: कोपेश्वर मंदिराची तटबंदी खुली करण्यास १८ घरांवर टांगती तलवार

Kolhapur Kopeshwar Temple Khidrapur

कुरुंदवाड : जमीर पठाण

खिद्रापूर (ता. शिरोळ) येथील कोपेश्वर मंदिराच्या जीर्णोद्धारासाठी शासनाने २४ कोटी रुपयांचा निधी देत तटबंदी, घाट आणि रस्ते रुंदीकरणाचे काम सुरू केले आहे. मात्र, तटबंदी स्पष्ट दिसावी यासाठी अडसर ठरणाऱ्या १८ मिळकतींचे प्रशासनाकडून गोपनीय मोजमाप व सर्वेक्षण केल्याची माहिती समोर आली आहे. तटबंदी दर्शनासाठी सुमारे चार एकरांहून अधिक जागा खुली करण्याचा प्रस्ताव आहे.

यासाठी ग्रामस्थांचा संभाव्य विरोध टाळण्यासाठी काही प्रक्रिया जाणीवपूर्वक गुप्तपणे राबवल्या जात आहेत. ग्रामपंचायत व महसूल प्रशासनाकडे माहिती घेतली असता 'आमच्याकडे याबाबत कोणतीच माहिती नाही,' असे उत्तर मिळत आहे. लोकप्रतिनिधी आणि ग्रामस्थांना विश्वासात न घेता प्रशासनाच्या बैठका झाल्या असून, या आडमुठ्या धोरणामुळे नाराजी पसरली आहे.

महापुराचे कारण दाखवत मंदिरासमोरील मिळकतींचे २ वर्षांपूर्वी मोजमाप करण्यात आले होते. तटबंदी स्पष्ट करण्याच्या नावाखाली त्या मिळकती हटवण्याच्या हालचाली सुरू झाल्या आहेत. यापूर्वी स्थलांतराच्या फॉर्मवर सह्या घेण्याचा प्रयत्न झाला होता, याला ग्रामस्थांनी तीव्र विरोध केला होता. तो अनुभव असतानाही प्रशासन पुन्हा त्याच दिशेने पावले टाकत असल्याची टीका होत आहे.