Kolhapur Municipal Corporation Thackeray Shiv Sena rally
कोल्हापूर: कोल्हापूर महानगरपालिकेतील कोट्यवधी रुपयांचा भ्रष्टाचार, ८५ लाखांची बोगस बिलांची उचल, १०० कोटींच्या रस्त्यांच्या कामात अनियमितता या विरोधात ठाकरे गटाच्या शिवसेनेने आज (दि.४) महापालिकेला घेराव घातला. गांधी मैदान येथून दुचाकी आणि रिक्षांच्या भव्य रॅलीने आंदोलकांनी महापालिकेपर्यंत धडक दिली.
ठाकरे गटाचे जिल्हा प्रमुख रविकिरण इंगवले यांनी महापालिकेतील अधिकारी आणि लोकप्रतिनिधी यांच्या संगनमताने मोठ्या प्रमाणावर भ्रष्टाचार झाल्याचा आरोप यावेळी केला. ८५ लाख रुपयांची बोगस बिलांची उचल, १०० कोटी रुपयांच्या रस्त्यांच्या कामात अपहार, तसेच इतर विविध आर्थिक गैरव्यवहारांची चौकशी करण्याची मागणी आंदोलकांनी केली. प्रशासनाने या गंभीर आरोपांकडे दुर्लक्ष केल्याचा आरोप करत, आंदोलनकर्त्यांनी तीव्र संताप व्यक्त केला.
गांधी मैदानातून निघालेल्या दुचाकी आणि रिक्षांच्या रॅलीने संपूर्ण शहराचे लक्ष वेधून घेतले. आंदोलकांनी महापालिकेच्या मुख्य प्रवेशद्वारासमोर जोरदार घोषणाबाजी केली. त्यानंतर आंदोलकांनी महापालिकेला चारही बाजूंनी घेराव घातला.
या आंदोलनामुळे महापालिकेच्या प्रशासनावर दबाव वाढला आहे. आंदोलकांनी इशारा दिला की, मागण्या मान्य न झाल्यास आंदोलन अधिक तीव्र केले जाईल. प्रशासनाने यावर अधिकृत प्रतिक्रिया दिलेली नाही. महापालिकेतील भ्रष्टाचाराच्या मुद्द्यावरून राजकीय वातावरण तापले आहे. दरम्यान, महापालिकेसमोर मोठ्या प्रमाणावर पोलीस बंदोबस्त तैनात करण्यात आला होता.