सावंतवाडी : सावंतवाडी शहराला हादरवून सोडणाऱ्या घरफोडीच्या गुन्ह्यात सावंतवाडी पोलिसांना मोठे यश मिळाले आहे. शिरोडा नाका, सर्वोदय नगर आणि शिक्षक कॉलनी परिसरात 4 सप्टेंबर 2025 च्या रात्री झालेल्या चोरीप्रकरणी पोलिसांनी दोन सराईत चोरट्यांना नवी मुंबई आणि महाड परिसरातून शिताफीने अटक केली.
या चोरट्यांनी 30 हजार रुपये रोख रक्कम आणि एक मोटारसायकल चोरी केल्याची कबुली दिली आहे. निवृत्त शिक्षक रघुनाथ गवस यांनी 4 सप्टेंबर रोजी दिलेल्या तक्रारीनुसार, अज्ञात चोरट्यांनी वेगवेगळ्या इमारतींमधील फ्लॅटचे कुलूप तोडून चोरी केली होती. या गुन्ह्यांमध्ये रोख रक्कम आणि मोटारसायकल चोरीला गेली होती.
या गंभीर गुन्ह्याच्या तपासासाठी सिंधुदुर्ग पोलिस अधीक्षक डॉ. मोहन दहिकर आणि अति. पोलिस अधीक्षक नयोमी साटम यांच्या मार्गदर्शनाखाली स्थानिक गुन्हा अन्वेषण शाखेचे पोलिस निरीक्षक प्रवीण कोल्हे आणि त्यांच्या पथकाने तांत्रिकदृष्ट्या कसून तपास केला. तांत्रिक पुराव्यांच्या आधारे तपास करत असताना, घरफोड्या करणारे सराईत संशयित सलीम महमद शेख (वय 35, रा. महाड) आणि तौफिक मोहम्मद शेख (30, रा. चिकोडी, बेळगाव) हे नवी मुंबई व महाड परिसरात लपून बसल्याचे पोलिसांना समजले. पथकाने तत्काळ कारवाई करत या दोघांना ताब्यात घेतले.
अटक करण्यात आलेल्या दोन्ही संशयितांना न्यायालयाने 16 ऑक्टोबरपर्यंत पोलिस कोठडी सुनावली आहे. सहा.पोलिस निरीक्षक पंकज शिंदे या गुन्ह्याचा पुढील तपास करत आहेत. या चौकशीतून चोरीस गेलेला आणखी ऐवज आणि अन्य गुन्ह्यांचा उलगडा होण्याची शक्यता पोलिसांनी व्यक्त केली आहे.