ओरोस : सावंतवाडी -माठेवाडा येथील नवविवाहीता सौ. प्रिया पराग चव्हाण हीला आत्महत्येस प्रवृत्त केल्याप्रकरणी गुन्हा दाखल असलेल्या देवगडच्या माजी नगराध्यक्षा प्रणाली माने व त्यांचा मुलगा आर्य माने यांना अतिरीक्त सत्र न्यायाधीश श्रीमती व्ही. एस. देशमुख यांनी 11 जुलै पर्यंत प्रत्येकी 25 हजार रुपयांचा अंतरिम अटकपूर्व जामीन मंजूर केला आहे. संशयितांच्या वतीने अॅड. उमेश सावंत यांनी काम पाहिले.
शुक्रवार 4 जुलै रोजी सौ. प्रिया हिने तिच्या राहत्या घराच्या बेडरुममध्ये गळफास लावून जीवन सपवले होते . याबाबत 6 जुलै रोजी तिचे वडील विलास तावडे (रा. कलंबिस्त) यांनी दिलेल्या फिर्यादीवरून भारतीय न्याय संहिता कलम 108 प्रमाणे गुन्हा दाखल करण्यात आला होता.
याबाबत दोन्ही संशयितांच्यावतीने अटकपूर्व जामिनासाठी सत्र न्यायालयात अर्ज दाखल केला होता. त्यावर झालेल्या सुनावणीत 11 जुलैपर्यंत प्रत्येकी 25 हजार रुपयांचा अंतरीम अटकपूर्व जामीन मंजूर करण्यात आला आहे. यात तपासात सहकार्य करावे, तसेच प्रत्यक्ष वा अप्रत्यक्ष पुराव्यात ढवळाढवळ करू नये, असे आदेश सत्र न्यायालयाने दिले आहेत.