कणकवली : गोव्याकडे जाणार्या खाजगी ट्रॅव्हल्सने त्याच दिशेने जात असलेल्या दुचाकीला मागून धडक दिल्याने झालेल्या अपघातात दुचाकीस्वार विनोद दिवाकर मोर्ये (32, रा. नांदगाव-शिसयेवाडी) हे गंभीर जखमी झाले.
हा अपघात मंगळवारी सकाळी 7.30 वा. च्या सुमारास घडला. जखमी विनोद मोर्ये यांना मॉर्निग वॉकसाठी बाहेर पडलेले संतोष बिडये यांनी स्थानिकांच्या मदतीने प्रथम नांदगाव प्रा. आ. केंद्रात नेले. तेथून अधिक उपचारासाठी कणकवलीतील खाजगी रूग्णालयात आणि तेथून कोल्हापूर येथे हलविले.
याबाबत फिर्याद संतोष बिडये यांनी कणकवली पोलिसात दिली आहे. या प्रकरणी ट्रॅव्हल्स चालक महेश शंकर राठोड (28, रा. कलमाड, बेळगाव) याच्यावर गुन्हा दाखल करण्यात आला आहे.
संतोष बिडये हे मंगळवारी सकाळी महामार्गावर मॉर्निग वॉक करत होते. घरी परत जात असताना गोव्याच्या दिशेने जाणार्या ट्रॅव्हल्सने विनोद मोर्ये यांच्या दुचाकीला जोरदार धडक दिली. यात विनोद यांच्या डोक्याला गंभीररित्या दुखापत होवून ते खाली कोसळले. त्याचवेळी मोठा आवाज झाल्याने संतोष बिडये यांनी मागून वळून बघितले असता ट्रॅव्हल्सने दुचाकीला ठोकर दिल्याचे दिसून आले. जखमी विनोद मोेर्ये यांना तातडीने उपचारासाठी त्यांनी प्राथमिक आरोग्य केंद्रात हलविले. अधिक तपास कासार्डे दुरक्षेत्राचे पोलिस हवालदार चंद्रकांत झोरे करीत आहेत.