कणकवली : ‘हॅपी फॅमिली’ या व्हॉटस्अॅप ग्रुपवर कोंबडे, बकरे कापण्याच्या कार्यक्रमाला लोकांनी उपस्थित राहू नये, उपस्थित राहिलात तर तुमच्याविरुद्ध जादूटोना कायद्यांतर्गत तुमच्यावर कारवाई करण्यात येईल, असा मॅसेज पाठवल्याच्या रागातून ग्रामसेवक सचिन आनंद पवार (41, रा. कणकवली, बांधकरवाडी-श्रीरामनगर) यांना व त्यांच्या पत्नीला लाथाबुक्क्यांनी मारहाण करत सचिन पवार यांच्या छातीवर, पोटावर व डाव्या हाताच्या बोटावर ब्लेडने वार करून जखमी करत जीवे मारण्याची धमकी दिल्याच्या तक्रारीवरून कणकवली बांधकरवाडी-श्रीरामनगर येथील पाच जणांवर गुन्हा दाखल करण्यात आला आहे.
ही घटना 1 जुलै रोजी दुपारी 3.30 वा. च्या सुमारास घडली होती. फिर्यादी सचिन पवार यांनी सकाळी 7.30 वा. च्या सुमारास व्हॉटसअॅप ग्रुपवर वरीलप्रमाणे मॅसेज टाकला होता. त्याच्या रागातून सचिन पवार व त्यांच्या पत्नीला दिलीप नामदेव पवार, मंदार दिलीप पवार, चेतन दिलीप पवार, जयश्री दिलीप पवार, काजल मंदार पवार यांनी लाथाबुक्क्यांनी मारहाण केली.
यातील चेतन पवार याने सचिन पवार यांना ब्लेडने वार करून जखमी केले. याबाबत सचिन पवार यांच्या फिर्यादीवरून दिलीप पवार यांच्यासह पाच जणांविरुद्ध गुन्हा दाखल करण्यात आला आहे. याप्रकरणी अधिक तपास सहा. पोलिस उपनिरीक्षक विनोद सुपल करत आहेत.
‘हॅपी फॅमिली’ या व्हॉटस्अॅप ग्रुपवर कोंबडे, बकरे कापण्याच्या कार्यक्रमाला लोकांनी उपस्थित राहू नये, उपस्थित राहिलात तर तुमच्याविरुद्ध जादूटोना कायद्यांतर्गत कारवाई करण्यात येईल, असा मॅसेज पाठवल्याच्या रागातून ही मारहाण करण्यात आली.
