रत्नागिरी : रत्नागिरी पालिकेच्या उपनगराध्यक्षपदाची निवडणूक सोमवारी (12 जानेवारी) होणार आहे. त्यासाठी भाजपची नुकतीच बैठक झाली. यामध्ये इच्छुकांपैकी नगरसेवक समीर तिवरेकर यांची उपनगराध्यक्षपदासाठी भाजपच्या पदाधिकाऱ्यांनी एकमताने सहमती दर्शवली असून सोमवारी याची औपचारिकता पूर्ण होणार आहे.
महायुती म्हणून स्थानिक स्वराज्य संस्थेच्या निवडणुकीमध्ये ठरलेेल्या धोरणाप्रमाणे नगराध्यक्षपद शिवसेनेला तर उपनगराध्यक्षपद भाजपला देण्यात आले आहे. त्यानुसार सोमवारी उपनगराध्यक्षपदाची निवडणूक होणार आहे. यासाठी भाजपमधून राजू तोडणकर, समिर तिवरेकर, सुप्रिया रसाळ, वर्षा ढेकणे यांची नावे चर्चेत होती. जिल्हा समन्वयक ॲड. दीपक पटवर्धन यांच्या अध्यक्षतेखाली महत्त्वाची बैठक झाली. या बैठकीला शहराध्यक्ष दादा ढेकणे, रत्नागिरी शहर समन्वयक सचिन वहाळकर व भाजपा पदाधिकारी या बैठकीला उपस्थित होते. या बैठकीमध्ये भाजपचे उपनगराध्यक्षपदाचे नाव निश्चित करण्यात आले. राजू तोडणकर यांची गटनेते म्हणून निवड झाल्यामुळे समिर तिवरेकर यांना उपनगराध्यक्ष म्हणून पक्षाने सहमती दर्शवली आहे. समिर तिवरेकर उच्चशिक्षित अभ्यासू असल्याने त्यांनी यापूर्वी देखील नगर परिषदेत नगरसेवक म्हणून काम करताना शहरातील अनेक विषय लावून धरले आणि ते तडीस नेले आहेत. त्यामुळे समिर तिवरेकर यांची सोमवारी उपनगराध्यक्ष म्हणून औपचारिक निवड होणार आहे. सत्ताधारी शिवसेनेचे नगरसेवक बाळू साळवी, भाजपकडून नगरसेवक राजू तोडणकर, तर उद्धव बाळासाहेब ठाकरे शिवसेनेकडून गटनेता म्हणून केतन शेटये यांच्या नावावर शिक्कामोर्तब झाले आहे.