जळगावात दोन सराईत गुन्हेगारांवर स्थानबद्धतेची कारवाई 

जिल्ह्यातील दोन सराईत गुन्हेगारांना जिल्हाधिकारी अमन मित्तल यांनी एमपीडीए कायद्याच्या अंतर्गत स्थानबध्द केले आहे. या कारवाईमुळे गुन्हेगारी वर्तुळात खळबळ उडाली आहे.

प्रकाश चंद्रकांत कंजर (३४, खंडेरावनगर जळगाव) व सोनू रामेश्वर पांडे (२८, भुसावळ) अशी स्थानबद्ध झालेल्यांची नावे असून त्यांची अनुक्रमे ठाणे व येरवडा कारागृहात रवानगी करण्यात आली. प्रकाश कंजर हा अवैधरीत्या हातभट्टीची दारू तयार करून त्याची विक्री करीत असल्याने त्याच्यावर आतापर्यंत एकूण ८ गुन्हे दाखल आहेत तर भुसावळातील सोनू पांडे याच्यावर घरफोडी, जबरी चोरी, शिविगाळ करून धमकी देणे असे ६ गुन्हे दाखल होते. पोलीस प्रशासनाने प्रस्ताव जिल्हाधिकारी अमन मित्तल यांच्याकडे सादर केल्यानंतर दोघांविरुद्ध एमपीडीए अंतर्गत कारवाईचे आदेश पारीत करण्यात आले आहेत.