पुढारी ऑनलाईन डेस्क : Team India 2023 Schedule : भारतीय क्रिकेट संघ या वर्षीच्या आपल्या मोहिमेची सुरुवात श्रीलंकेविरुद्धच्या मर्यादित षटकांच्या मालिकेने करेल. हे वर्ष संघासाठी खूप महत्त्वाचे असेल. याचे सर्वात मोठे कारण म्हणजे 2023 मध्ये होणारा एकदिवसीय विश्वचषक (ODI World Cup 2023), जो केवळ भारतात होणार आहे. याशिवाय आशिया कप (Asia Cup) आणि वर्ल्ड टेस्ट चॅम्पियनशिपची फायनल (WTC Final) ही होणार आहे.
श्रीलंकेचा संघ 2023 मध्ये तीन टी-20 आणि तीन वन डे सामन्यांची मालिका खेळण्यास भारताच्या दौ-यावर येत आहे. ही मालिका 3 जानेवारी पासून सुरू होईल.
न्यूझीलंडचा संघ जानेवारीच्या अखेरीस मर्यादित षटकांच्या मालिकेसाठी भारतात येणार आहे. यादरम्यान तीन वन डे आणि तीन टी-20 सामन्यांची मालिका खेळवली जाणार आहे.
ऑस्ट्रेलिया संघ फेब्रुवारी-मार्चमध्ये भारत दौऱ्यावर येणार आहे. यादरम्यान 4 सामन्यांची कसोटी मालिका खेळवली जाणार आहे. वर्ल्ड टेस्ट चॅम्पियनशिपची अंतिम फेरी गाठण्यासाठी टीम इंडियासाठी (Team India) ही मालिका खूप महत्त्वाची आहे. यानंतर दोन्ही संघांमध्ये 3 सामन्यांची एकदिवसीय मालिकाही खेळवली जाणार आहे.
इंडियन प्रीमियर लीग 2023 (IPL 2023) एप्रिल-मे मध्ये खेळवली जाईल. 10 संघांची ही लीग दोन महिने चालणार आहे. या काळात भारतीय खेळाडूंचे आंतरराष्ट्रीय क्रिकेट जवळपास बंद असेल.
वर्ल्ड टेस्ट चॅम्पियनशिपचा अंतिम सामना (WTC Final Oval) जूनमध्ये इंग्लंडमधील ओव्हल क्रिकेट स्टेडियमवर खेळवला जाईल. सध्या ऑस्ट्रेलियाचे अंतिम फेरीतील स्थान जवळपास निश्चित झाले आहे. त्याचबरोबर टीम इंडियाही मजबूत स्थितीत आहे. याशिवाय श्रीलंका आणि दक्षिण आफ्रिका शर्यतीत आहेत.
टीम इंडिया जुलै-ऑगस्टमध्ये वेस्ट इंडिजचा दौरा करणार आहे. यादरम्यान दोन सामन्यांची कसोटी, तीन सामन्यांची वन डे आणि तीन सामन्यांची टी-20 मालिका खेळवली जाईल.
पाकिस्तान हा 2008 नंतर प्रथमच 2023 मध्ये आशिया कपचे यजमानपद भूषवणार आहे. मात्र, दोन्ही देशांमधील तणावामुळे टीम इंडिया (Team India) पाकिस्तानचा दौरा करणार का? असा प्रश्न आहे. बीसीसीआयचे सचिव आणि आशिया क्रिकेट परिषदेचे अध्यक्ष जय शाह यांनी ही स्पर्धा तटस्थ ठिकाणी आयोजित करण्याबाबत सुचवले आहे. पण त्यावर अद्याप निर्णय झालेला नाही.
ऑस्ट्रेलियन वनडे विश्वचषक स्पर्धेच्या तयारीच्या दृष्टीने सप्टेंबर 2023 मध्ये तीन सामन्यांच्या एकदिवसीय मालिकेसाठी भारताचा दौरा करणार आहे.
एकदिवसीय विश्वचषक ऑक्टोबर-नोव्हेंबरमध्ये भारतात आयोजित केला जाणार आहे. 2011 मध्ये महेंद्रसिंग धोनीच्या नेतृत्वाखाली टीम इंडिया शेवटच्या वेळी वर्ल्ड चॅम्पियन बनली होती.
नोव्हेंबर-डिसेंबर 2023 मध्ये ऑस्ट्रेलियाचा संघ एकाच वर्षात तिसऱ्यांदा भारतात येणार आहे. दोन्ही संघांमध्ये पाच सामन्यांची कसोटी मालिका खेळवली जाणार आहे.
2023 च्या शेवटी टीम इंडिया द. आफ्रिकेच्या दौऱ्यावर जाणार आहे. दोन्ही संघांमध्ये दोन कसोटी सामने, तीन वन डे आणि तीन टी-20 सामन्यांची मालिका होणार आहे. हा दौरा जानेवारी 2024 मध्ये संपेल.