woman accidentally swallowed airpod instead of ibuprofen medicine
पुढारी ऑनलाईन :
सध्याच्या टेक्नोसॅव्ही जगात लोकांकडून नवनवीन गॅझेट वापरणे हे नित्याचेच आणि सवईचे झाले आहे. लोक सतत इयरबड्स आणि एअरपॉड्सचा वापर करत असतात. पण अमेरिकेतील एका महिलेसोबत अशी विचित्र घटना घडली की सोशल मीडियावर लाखो लोक आश्चर्यचकित झाले. २७ वर्षीय एका महिलेने चुकून औषधाऐवजी स्वतःचे एअरपॉड्स गिळले. सुरुवातीला तिला इतकी मोठी चूक कशी झाली हेच समजले नाही, पण काही वेळानंतर जे घडले त्यामुळे ती प्रचंड घाबरली.
ही घटना अमेरिकेतील बोस्टन येथे राहणाऱ्या २७ वर्षीय पॉडकास्टर कार्ली बेलमर हिच्यासोबत घडली. कार्ली सोशल मीडिया प्लॅटफॉर्म टिकटॉकवर खूप सक्रिय असते. तिने स्वतः या संपूर्ण घटनेबद्दल व्हिडिओ बनवून लोकांना सांगितले. तिचा व्हिडिओ काही वेळातच व्हायरल झाला आणि लाखो लोकांनी तो पाहिला.
कार्लीने सांगितले की ती रात्री बेडवर पडली होती. तिच्या एका हातात ८०० मिलीग्रामची आयबुप्रोफेन गोळी होती आणि दुसऱ्या हातात एअरपॉड्स होते. दोन्ही वस्तू हातात असल्यामुळे ती गोंधळली आणि चुकून औषधाऐवजी एअरपॉड्स पाण्यासोबत गिळून टाकले.
सोशल मीडियावर व्हायरल झाली महिलेची गोष्ट
कार्लीने व्हिडिओमध्ये सांगितले, “मी बेडवर होते. एका हातात आयबुप्रोफेनची गोळी होती आणि दुसऱ्या हातात माझे एअरपॉड्स होते. लक्ष न देता मी एअरपॉड्सच गिळले.”
सुरुवातीला तिला नेमके काय झाले हे समजले नाही. पण काही वेळाने तिच्या घशात काहीतरी विचित्र जाणवू लागले. तेव्हा तिला शंका आली की तिने चुकून एअरपॉड्स गिळले आहेत. कार्ली म्हणाली, “ते आयबुप्रोफेनमुळे होत नव्हते हे मला लक्षात आले. मी उलटी करून ते बाहेर काढण्याचा प्रयत्न केला, पण ते बाहेर आले नाही. त्या वेळी मी खूप घाबरले होते.”
इतकी मोठी चूक कशी झाली?
सर्वात धक्कादायक गोष्ट तेव्हा घडली जेव्हा तिच्या पोटातून आवाज येऊ लागला. कारण एअरपॉड्स अजूनही तिच्या आयफोनशी कनेक्ट होते. तिने आपल्या मैत्रिणीला व्हॉईस मेसेज पाठवला होता आणि त्याचा आवाज तिला पोटातून ऐकू येत होता.
कार्ली म्हणाली, “आता हे ऐकायला मजेदार वाटते, पण त्या वेळी ते खूप भीतीदायक होते. मला खरोखर वाटत होते की माझ्या पोटात काहीतरी चालू आहे.”
तिने ही घटना टिकटॉकवर शेअर केली आणि काही वेळातच व्हिडिओ व्हायरल झाला. अनेकांनी तिच्या लवकर बरे होण्यासाठी शुभेच्छा दिल्या, तर काहींनी या गोष्टीवर विश्वास ठेवला नाही.
एका यूजरने लिहिले, “एअरपॉड्स आणि औषध यात फरक कसा विसरू शकतो?” तर दुसऱ्याने म्हटले, “हे फक्त लक्ष वेधून घेण्याचा प्रकार वाटतो.” मात्र काही लोकांनी कार्लीचे समर्थनही केले. एका व्यक्तीने लिहिले, “८०० मिलीग्रामची आयबुप्रोफेन गोळी खूप मोठी असते. लक्ष नसल्यास अशी चूक होऊ शकते.”
डॉक्टरांनी दिला गंभीर ईशारा
नंतर कार्ली रुग्णालयात गेली, जिथे डॉक्टरांनी तिचा एक्स-रे केला. एक्स-रेमध्ये एअरपॉड्स तिच्या पचनसंस्थेत पोहोचल्याचे स्पष्ट दिसले. डॉक्टरांनी सांगितले की एअरपॉड्स शरीरातून नैसर्गिक मार्गाने बाहेर पडू शकतात.
कार्लीने नंतर सांगितले, “एक्स-रेमध्ये एअरपॉड्स माझ्या पोटात असल्याचे दिसले. नंतर ते शरीरातून बाहेर पडले. मी ते पुन्हा वापरले नाही, पण ते बाहेर आले हे निश्चित आहे.”
ही पहिलीच घटना नाही. यापूर्वीही अशा अनेक घटना समोर आल्या आहेत. २०२१ मध्ये अमेरिकेतील मॅसॅच्युसेट्स येथे एका व्यक्तीने झोपेत एअरपॉड्स गिळले होते. सकाळी उठल्यानंतर त्याला श्वास घेण्यास त्रास होऊ लागला. डॉक्टरांना एंडोस्कोपी करून एअरपॉड्स बाहेर काढावे लागले.
याशिवाय जॉर्जियामध्ये सात वर्षांच्या एका मुलानेही एअरपॉड्स गिळले होते. डॉक्टरांनी त्याला काही काळ निरीक्षणाखाली ठेवले आणि नंतर ते नैसर्गिकरित्या शरीरातून बाहेर पडले.
डॉक्टरांचे म्हणणे आहे की अशा घटना मजेशीर वाटल्या तरी त्या अत्यंत धोकादायक ठरू शकतात. एअरपॉड्स किंवा कोणतीही इलेक्ट्रॉनिक वस्तू गिळल्यास घसा, पोट आणि आतड्यांना इजा होऊ शकते. काही वेळा बॅटरी लीक होण्याचाही धोका असतो, ज्यामुळे गंभीर समस्या निर्माण होऊ शकतात.
या घटनेनंतर कार्लीने लोकांना सावध राहण्याचे आवाहन केले. ती म्हणाली की औषधे घेताना विशेष काळजी घेणे आवश्यक आहे, विशेषतः आसपास लहान इलेक्ट्रॉनिक वस्तू असतील तर. कार्लीची ही विचित्र आणि धक्कादायक कहाणी आता सोशल मीडियावर चर्चेचा विषय बनली आहे. काही लोकांना ती मजेदार वाटत आहे, तर काही जण याकडे छोट्याशा निष्काळजीपणामुळे मोठी समस्या निर्माण होऊ शकते, अशा इशाऱ्याच्या स्वरूपात पाहत आहेत.