पुढारी ऑनलाईन : भारतात तब्बल २७ वर्षानंतर ७१ व्या मिस वर्ल्ड २०२३ (Miss World 2023) स्पर्धेचे आयोजन केले जात आहे. याबाबतची अधिकृत घोषणा मिस वर्ल्ड ऑर्गनायझेशनने ८ जून रोजी दिल्लीत आयोजित पत्रकार परिषदेत केली. भारतात याआधी १९९६ मध्ये मिस वर्ल्ड स्पर्धा झाली होती. यंदाच्या मिस वर्ल्ड स्पर्धेत मिस इंडिया वर्ल्ड २०२२ ची विजेती सिनी शेट्टी भारताचे प्रतिनिधीत्व करणार आहे.
भारताला अधिकृत यजमानपदाचे अधिकार सुपूर्द करताना मिस वर्ल्ड ऑर्गनायझेशनच्या अध्यक्षा आणि सीईओ ज्युलिया मोर्ली (Chairperson and CEO, Miss World Organization, Ms Julia Morley) म्हणाल्या की, "७१ व्या मिस वर्ल्ड स्पर्धेचे आयोजन भारतात होत असल्याची घोषणा करताना मला खूप आनंद होत आहे. मी ३० वर्षांपूर्वी भारतात पहिल्यांदा आले होते आणि तेव्हापासून भारतासाठी माझ्या हृदयात एक विशेष स्थान आहे. भारताची अनोखी आणि वैविध्यपूर्ण संस्कृती, इथली चित्तथरारक ठिकाणे जगासोबत शेअर करण्यास आम्ही उत्सुक आहोत."
७१ व्या मिस वर्ल्ड स्पर्धेत (71st Miss World 2023) १३० देशांच्या स्पर्धक त्यांच्या एका महिन्याच्या अतुल्य भारतातील प्रवासात त्यांची कामगिरी सिद्ध करतील. कारण आम्ही ७१ वी ही स्पर्धा सर्वात नेत्रदीपक मिस वर्ल्ड फायनल म्हणून सादर करु," असे मिस वर्ल्ड ऑर्गनायझेशनच्या अध्यक्षा ज्युलिया मोर्ली यांनी सांगितले.
१३० हून अधिक देशांतील स्पर्धकांचा सहभाग असलेल्या आणि महिनाभर चालणार्या या इव्हेंटमध्ये टॅलेंट, स्पोर्टस् आणि लोकहितासाठीचे उपक्रम अशी आव्हानात्मक स्पर्धा असेल. विद्यमान मिस वर्ल्ड पोलंडची कॅरोलिना बिएलॉस्का (Miss World 2022 Karolina Bielawska) सध्या भारत दौऱ्यावर आहे. ती या सौंदर्य स्पर्धेबद्दल जागृती करत आहे. तिने म्हटले आहे की ती या "सुंदर देशात" मिस वर्ल्डचा मुकुट सोपवण्यास उत्सुक आहे. (Miss World 2023)
"संपूर्ण जगात उत्कृष्ट आदरातिथ्यासाठी भारताची ओळख आहे. येथे येण्याची माझी दुसरी वेळ आहे. येथे मला माझ्या घरासारखे वाटले. इथली विविधता, एकता, कौटुंबिक मुल्ये, आदर, प्रेम, दयाळूपणा या सर्व गोष्टी मला जगाला सांगायला आवडेल. इथे पाहण्यासारखे बरेच काही आहे आणि संपूर्ण जगाला एका महिन्यासाठी इथे आणणे आणि भारताने जे काही ऑफर करायचे आहे ते दाखवणे ही सर्वोत्तम कल्पना आहे," असे मिस वर्ल्ड २०२२ ची विजेती कॅरोलिनाने म्हटले आहे.
भारताने सहा वेळा प्रतिष्ठित मिस वर्ल्ड स्पर्धा जिंकली आहे. रीटा फारिया (१९६६), ऐश्वर्या राय (१९९४), डायना हेडन (१९९७), युक्ता मुखी (१९९९), प्रियांका चोप्रा (२०००) आणि मानुषी छिल्लर (२०१७) या मिस वर्ल्ड स्पर्धेच्या विजेत्या आहेत.
हे ही वाचा :