पणजी: मांडवी नदीतील कॅसिनो जहाजांनी जवळपास २२ महिने अधिकृत सरकारी अधिसूचना नसताना अवैधरीत्या जुगार व्यवसाय चालविल्याचा गंभीर आरोप आरटीआय कार्यकर्ते सुदीप ताम्हणकर यांनी केला आहे.
पणजी पोलिस स्थानकात तक्रार करून त्याबद्दल गुन्हा नोंदविण्याची मागणी त्यांनी केली आहे. संबंधित कॅसिनो कंपन्यांच्या संचालक मंडळांसह गेमिंग कमिशनर यांच्यावर या तक्रारीत ठपका ठेवण्यात आला आहे.
मांडवी नदीतील कॅसिनो जहाजांना व्यवसायाची परवानगी देणारी शेवटची सरकारी अधिसूचना १० जानेवारी २०२३ रोजी जारी झाली होती. या अधिसूचनेनुसार कॅसिनो व्यवसायाची वैधता केवळ ३१ मार्च २०२३ पर्यंतच होती. त्यानंतर पुढील अधिसूचना २३ जानेवारी २०२५ पर्यंत जारी करण्यात आली नाही.
त्यामुळे एप्रिल २०२३ ते जानेवारी २०२५ या कालावधीत जवळपास २२ महिने कॅसिनो जहाजांवर जुगार व्यवसाय कोणत्याही कायदेशीर परवानगीशिवाय सुरू होता, असा आरोप त्यांनी केला आहे. ताम्हणकर यांनी आरोप केला आहे की, कॅसिनो कंपन्यांनी जाणीवपूर्वक परवानगी नसताना व्यवसाय सुरू ठेवला आणि या कालावधीत शेकडो कोटी रुपयांचे बेकायदेशीर उत्पन्न मिळवले.
या तक्रारीत पोलिसांना कॅसिनो कंपन्या आणि गेमिंग कमिशनर यांच्याविरोधात एफआयआर नोंदवण्याची, जहाजांच्या नोंदींची चौकशी करण्याची आणि बेकायदेशीर जुगारातून मिळवलेल्या उत्पन्नाची जप्ती करण्याची मागणी करण्यात आली आहे.