पणजी : पुढारी वृत्तसेवा
देशभरातील कोट्यवधी रुपयांच्या कथित सायबर गुन्हेगारी आणि मनी लॉन्ड्रिंग रॅकेट प्रकरणी सक्तवसुली संचालनालयाने (ईडी) अटक केलेल्या ठाणे (मुंबई) येथील ४६ वर्षीय मुकेश कुमार पुखराज जैन उर्फ 'मुकेश भाई' याला उत्तर गोवा विशेष पीएमएलए न्यायालयाने तीन दिवसांची ईडी कोठडी सुनावली आहे. जैन याला १९ ऑक्टोबरपर्यंत ईडी कोठडीत ठेवण्याचे आदेश न्यायालयाने दिले.
गोवा ईडीने काल शुक्रवारी रात्री जैनला प्रतिबंधित मनी लॉन्ड्रिंग कायदा (पीएमएलए) अंतर्गत अटक केली होती. शनिवारी सकाळी त्याला मेरशी येथील विशेष न्यायालयासमोर हजर करण्यात आले. अटकेची प्रक्रिया आणि घटनात्मक सुरक्षेच्या तरतुदींचे पालन झाल्याची खात्री न्यायालयाने केली.
आर्थिक व्यवहारांची साखळी, अद्याप ओळख पटायचे दलाल आणि लपवून ठेवलेली रोख रक्कम याबाबत पुढील चौकशी करण्यासाठी जैनची कोठडी आवश्यक असल्याचे ईडीने न्यायालयाला सांगितले. त्यानंतर विशेष न्यायालयाने १९ ऑक्टोबरपर्यंत तीन दिवसांची ईडी कोठडी मंजूर केली.
या मनी लॉन्ड्रिंग तपासाची सुरुवात जून २०२५ मध्ये उत्तर गोवा सायबर क्राइम पोलिस ठाण्यात दाखल झालेल्या एफआयआरमधून झाली. दूरसंचार नियामक प्राधिकरण (ट्राय) आणि केंद्रीय अन्वेषण विभागाचे अधिकारी असल्याचे भासवून सायबर ठगांनी मडगाव येथील एका महिला आणि तिच्या पतीला चोवीस तास व्हिडिओ निगरानीखाली ठेवल्याचा आरोप आहे. महिलेला धमकावले आणि बनावट 'सीक्रेट सुपरव्हिजन अकाउंट'मध्ये २.६० कोटी स्थानांतरित करण्यास भाग पाडले होते.