पणजी : पुढारी वृत्तसेवा
कोकण रेल्वे मार्गाच्या दुपदरीकरणाच्या कामाला गती देण्यासाठी पेडणे आणि जुने गोवे येथे नव्याने बोगदे खोदण्यात येणार आहेत. या कामासाठी रेल्वे मंत्रालयाने निधी मंजूर केला असल्याची माहिती कोकण रेल्वेचे अध्यक्ष व व्यवस्थापकीय संचालक संतोषकुमार झा यांनी दिली.
लोहमार्गाचे विद्युतीकरण पूर्ण झाले असून, त्यामुळे इंधनावरील वार्षिक १५० कोटी रुपयांची बचत होत आहे. आता मंगळूर ते गोवा आणि गोवा ते वैभववाडी या टप्प्यांचे दुपदरीकरण करण्यासाठी सर्वेक्षण सुरू आहे.
सर्वेक्षणानंतर प्रकल्प अहवाल तयार करून मंत्रालयाची मंजुरी घेण्यात येणार आहे. या प्रकल्पासाठी पेडणे आणि जुने गोवे येथे बोगदे बांधावे लागणार असून, त्यासाठी निधी यापूर्वीच मंजूर झाला आहे, असे झा यांनी सांगितले. कोलाड ते सुरतकल मार्गावर सध्या ट्रक वाहून नेणारी रो-रो सेवा सुरू आहे.
ऑक्टोबरपासून या सेवेत मासिक १२ ऐवजी ४६ फेऱ्या करण्यात येणार असून, त्यातून ५७ टनी ट्रकची वाहतूक केली जाणार आहे. कोकण रेल्वेने महसूलवाढीवर भर दिला असून, त्यासाठी २३ हजार ५०० कोटी रुपयांची कामे मिळवण्यात आली आहेत, अशी माहिती झा यांनी दिली.
बोगदे खोदणे, लोहमार्गांचे विद्युतीकरण आणि पूल बांधणे यांसारख्या कामांत कोकण रेल्वेने विशेष निपुणता मिळवली आहे. त्याच्या आधारे देशातील विविध भागांतील विद्युतीकरणाची कामेही कोकण रेल्वेला मिळाली आहेत. येत्या सहा महिन्यांत आणखी १५ हजार कोटी रुपयांची कामे मिळण्याची शक्यता असल्याचे झा यांनी सांगितले.