दाबोळी : पुढारी वृत्तसेवा
मुरगाव बंदरावरील टर्मिनलमध्ये मोठ्या प्रमाणातील बल्क कार्गो हाताळणीच्या क्षेत्रात ग्रुप डेल्टाने आणखी एक महत्त्वपूर्ण विक्रम नोंदवला आहे. डेल्टा पोर्ट मुरगाव टर्मिनलच्या धक्का क्र. ११ वर उभ्या असलेल्या 'एमव्ही फिलीप्पोस' या जहाजावर सलग २४ तासांच्या कालावधीत तब्बल ३७,४०५ मेट्रिक टन नॉन-ॲलॉय पिग आयर्न लोड करण्यात आले.
या विक्रमी कामगिरीमुळे ग्रुप डेल्टाने स्वतःचे यापूर्वीचे लोडिंग विक्रम मागे टाकत नवा ऑपरेशनल बेंचमार्क प्रस्थापित केला आहे. हे जहाज २५ ऑगस्ट २०२६ रोजी मुरगाव बंदरात दाखल झाले असून, प्रतिष्ठित ग्राहक 'जेएसडब्ल्यू' साठी एकूण ५२,०४० मेट्रिक टन नॉन-ॲलॉय पिग आयर्न लोड केले जाणार आहे.
या मालवाहतुकीचे विशेष महत्त्व आहे, कारण गोवा बंदरातून अमेरिकेतील बंदराकडे नॉन-ॲलॉय पिग आयर्नची ही पहिली अशा प्रकारची निर्यात वाहतूक आहे. यामुळे गोव्याची आंतरराष्ट्रीय सागरी आणि लॉजिस्टिक क्षेत्रातील क्षमता तसेच जागतिक कार्गो वाहतुकीतील वाढती भूमिका अधोरेखित झाली आहे.
ही उल्लेखनीय कामगिरी डेल्टा पोर्ट - डेल्टा इन्फ्राऑपरेशनल लॉजिस्टिक्स तसेच टर्मिनल आणि कार्यालयातील संपूर्ण टीमच्या उत्कृष्ट समन्वयाचे फलित आहे. प्रभावी नियोजन, योग्य उपकरणांची तैनाती, कार्गो समन्वय आणि चोवीस तासांच्या कार्यक्षमतेमुळे हा विक्रम साध्य झाला.
या कामगिरीसाठी ग्रुप डेल्टाचे उपाध्यक्ष राघोबा कोटकर यांच्या नेतृत्वाखाली डेल्टा पोर्टचे महाव्यवस्थापक बेनेडिक्टो, डेल्टा इन्फ्राऑपरेशन्सचे ऑपरेशन्स व्यवस्थापक सर्वेश मोराजकर तसेच ऑपरेशन्स, दस्तऐवजीकरण, उपकरणे, सुरक्षा आणि सपोर्ट टीमने महत्त्वपूर्ण योगदान दिले.
ही विक्रमी कामगिरी ऑपरेशनल उत्कृष्टता, उत्पादकता, ग्राहक समाधान आणि मोठ्या प्रमाणातील बल्क कार्गो सुरक्षित व कार्यक्षम हाताळणी करण्याच्या ग्रुप डेल्टाच्या क्षमतेचे प्रतीक आहे. ग्रुप डेल्टाने कार्यक्षम बंदर संचालनासाठी सातत्याने सहकार्य आणि पाठिंबा दिल्याबद्दल मुरगाव पत्तन प्राधिकरण तसेच सर्व संबंधित भागधारकांचे मनःपूर्वक आभार मानले आहेत.
त्यांच्या सहकार्यामुळे गोव्याची आंतरराष्ट्रीय कार्गो वाहतुकीसाठी एक विश्वासार्ह प्रवेशद्वार म्हणून ओळख अधिक मजबूत होत आहे. या यशात सहभागी झालेल्या प्रत्येक टीम सदस्याचे ग्रुप डेल्टाच्या व्यवस्थापनाने मनःपूर्वक कौतुक केले आहे. त्यांची मेहनत, समन्वय आणि आव्हानांवर मात करण्याची जिद्द यामुळे पुन्हा एकदा सिद्ध झाले आहे की डेल्टा टीम एकत्रितपणे काम करते तेव्हा असाधारण कामगिरी साध्य करू शकते.