Goa Crime Branch Inspector Booked Under POCSO For Minor Assault
पणजी : अल्पवयीन मुलीवर लैंगिक अत्याचार केल्याच्या आरोपावरून गुन्हे शाखेचे पोलिस निरीक्षक विकास देयकर यांच्याविरोधात जुने गोवे पोलिसांनी बलात्कार, पोक्सो कायद्याखाली गुन्हा दाखल केला आहे. या कारवाईला एका वरिष्ठ पोलिस अधिकाऱ्याने दुजोरा दिला आहे.
कथित लैंगिक अत्याचाराची घटना गुन्हे शाखेच्या आवारात घडल्याचा आरोप १७ वर्षीय तक्रारदार मुलीने केला आहे. पीडित मुलगी एका तक्रारीच्या संदर्भात गुन्हे शाखेमध्ये आली होती तेव्हा पोलिस निरीक्षक विकास देयकर यांनी या मुलीशी गैरवर्तन तसेच लैंगिक अत्याचार केल्याचा आरोप तिने केला आहे.
हे प्रकरण अल्पवयीन मुलीशी संबंधित असल्याने पोलिसांकडून तपास गोपनीय पद्धतीने होत आहे. तक्रारीच्या आधारे जुने गोवे पोलिसांनी संबंधित गुन्हा नोंदवून तपास सुरू केला आहे. या घटनेची पार्श्वभूमी, कथित प्रकाराची परिस्थिती आणि त्यामध्ये संबंधित पोलीस अधिकाऱ्याची भूमिका याबाबत पोलिसांकडून माहिती गोळा केली जात आहे.
हे प्रकरण गुन्हे शाखेच्या आवारातच घडल्याचा आरोप करण्यात आल्याने वरिष्ठ पोलिस अधिकाऱ्यांनीही हे प्रकरण गंभीरतेने घेतले आहे. जनतेचे सेवक असलेले पोलिस अधिकारी हे भक्षक बनल्याचा आरोप झाल्याने पोलिस खात्याची प्रतिमा डागाळली गेली आहे.
ज्या ठिकाणी ही मुलगी पोलिस निरीक्षकाला भेटली तेव्हा त्यावेळी उपस्थित असलेल्या इतर पोलिसांच्या जबान्या व चौकशी करण्यात येत आहे अशी माहिती पोलिस सूत्राने दिली. दरम्यान, प्रकरणाचा तपास सुरू असून, आरोपांची सत्यता तपासानंतरच स्पष्ट होणार आहे.